CEBU, Philippines - Ang 2017 edition sa tinuig nga Online Basketball Training Camp gikatakda nga mosikad karong Abril 3 sa duha ka binyu, ang Cebu Eastern College gym ug ang Minglanilla Sports Complex.
Matag adlaw ang training session gikan sa alas-8 hangtod sa alas-11 sa buntag sa CEC gym ug gikan sa ala-1:30 hangtod sa alas 4:30 sa hapon didto sa Minglanilla.
Si training camp director Mark Anthony Tallo, PBA player ug amahan ni collegiate star Mark Jayven Tallo sa Southwestern University-Phinma Cobras, nagkanayon nga ang Online camp dunay labing bag-o nga ekipo nga gikinahanglan sa paghashas ug pagpalambo sa abilidad sa mga batan-ong basketbolista nga mosalmot sa ilang camp.
Gawas sa Cebu, ang Online camp molabyog sab sa ubang mga dapit apil na sa Tubigon, Bohol ug Leyte ug ingon man sa Davao, Gingoog, Salay ug Medina, Misamis Oriental didto sa Mindanao.
Ang registration fee sa maong usa ka bulan nga training camp nagkantidad og P1,300, apil na niini ang upper uniform ug basketball. Alang sa dugang mga detalye, mahimong motawag sa 0923-4001318 o 0905-8139093. (BANAT NEWS)