Mahimong kritikal ang habig sa Konseho sa dakbayan sa Sugbo kun idayon sa Filinvest Land Inc. ang pag-atras sa kontrata pagpalit sa luna sa South Road Properties.
Mismo si Mayor Tomas Osmeña ang mipahibalo niadtong Domingo nga ang Filinvest moatras sa kontrata tali sa siyudad. Pagkasunod adlaw, ang opisyal sa Filinvest nga si Tristan Las Marias nagpa-presscon aron ikonpirmar ang pag-atras sa Filinvest sa kontrata.
Mahimo ba nga moatras ang Filinvest og iya ra nga walay pagtugot sa kagamhanan sa siyudad sa Sugbo? Natawo ang kontrata sa Filinvest ug consortium sa SM ug Ayala tali sa siyudad sa Sugbo pinaagi sa pirma sa mayor isip representante sa kagamhanan sa siyudad. Apan dili makapirma sa kontrata ang mayor kun walay “authority” sa Konseho.
Mao usab kini sa habig sa Filinvest. Mahimo ba nga moatras sa ingon kasayon ang maong kompaniya sa rason nga adunay mga kondisyon nga wala ma-deliver sa usa ka habig, ning kasoha, ang kagamhanan sa siyudad sa Sugbo?
Sumala sa balita, apil sa gikasabutan nga ang City Hall mo-turnover og mga dokumento sama sa titulo sa luna nga napalit sulod sa unom ka bulan human sa pagpirma ug human ang FLI, Ayala-SM consortium makabayad sa katunga sa purchase amount. Mao ra ni ang rason sa pag-rescind?
Dili ba lugak kaayo kining maong rason sa pag-atras sa kontrata? Kun wala ma-deliver sa City Hall ang mga dokumento, mipadala na ba og “demand” ang FLI aron pugson ang kagamhanan sa siyudad pag-deliver sa maong mga dokumento?
Human sa demand, kun magdumili ang kagamhanan sa pag-deliver, anha na ma-“default” ang City Hall. Kun default na ang City Hall, mahimong mopasaka og kaso ang FLI og specific performance pagpa-deliver sa mga dokumento ug mangayo og damyos.
Ang pag-rescind sa kontrata tali sa usa ka balido nga gobiyerno, makaduda kaayo. Kun wala maka-deliver ang City Hall, wala kaha kini tuyoa? Sa mga kontrata nga pagaapilan sa kagamhanan, kinahanglang adunay “faithful performance” kun pagsunod sa termino ug kondisyones sa kontrata nga walay bahid.
Dili si Osmeña ug mga konsehal lang ang maalanganin kun masiyakoy ang usa ka kontrata. Ang katunga sa prisyo sa luna nga P8.3 milyones anaa na sa panudlanan sa siyudad. Dili na kini angayang disturbohon.
Gikinahanglan kaayo kini alang sa serbisyo sa katawhan sa siyudad sa Sugbo. Pila ka classroom ang matukod niining maong kantidad? Pila ka BHW, tanod, ug mga barangay workers ang masuweldohan? Pila ka gutom nga mga bata ang mahimong mapakaon?
Dili hinuon mahimong i-uli sa tumang kasayon ang maong kantidad. Misulod na kini sa kaban sa gobiyerno, ug kun i-uli kini, magsunod kini og lisud nga proseso.