CEBU, Philippines - Managlahing kapalaran ang natagamtaman sa duha ka NBA finalists sa miaging season nga mao ang Golden State Warriors ug Cleveland Cavaliers kagahapon.
Ang Warriors gipakuratan sa Sacramento Kings, 106-109, diin naputol ang ilang 13-game winning streak. Si Kings All-Star DeMarcus Cousins wala kapugngi sa iyang 32 puntos ug 12 ka rebounds uban ang siyam ka assists.
"It feels amazing," matud pa ni Cousins sa Agence France Presse."It was a complete team effort, and we came out and got a big win."
Nakadugang sa demalas sa Warriors mao ang pagkalagpot sa playing court sa ilang head coach nga si Steve Kerr human sa pagpunay niini og reklamo sa referees. May kahigayunan unta nga mudaog ang Warriors, apan mikagar ang layup ni reigning MVP Stephen Curry sa krusyal nga gutlo sa duwa.
Sa ilang bahin, si Cavs star LeBron James midiga og 32 puntos diin nahimo siyang labing batang player sa kasaysayan nga nakahimo og 28,000 points. Ang Cavs mikastigo sa New York Knicks, 111-104 didto sa Madison Square Garden.
Si James maoy labing bata nga miabot og 28,000 points sa edad nga 32-anyos. Misaka usab siya sa ikawalong dapit sa NBA all-time scoring list. Nagkaduol usab ni James ang laing record isip ika-13 sa all-time assists leader tungod kay kinahanglan na lang siya og duha aron malabwan ang 7,211 ni NBA legend Lenny Wilkens. (LPM)(BANAT NEWS)