Maliksi migilak isip 'Star' sa Hotshots
CEBU, Philippines - Ang pagbiya ni James Yap atol sa off-season nakahatag og oportunidad ni Allen Maliksi aron mogilak isip usa ka bitoon ubos ni Star Hotshots coach Chito Victolero.
Sa dihang gihatagan og lisensiya isip tirador, wala pakyasa ni Maliksi kadtong mga naglaum kaniya sa habig sa Star nga nakat-on na pagsakmit og mahinungdanong daog karon nga wala na sa ilang poder si Yap.
Gani si Maliksi maoy bida sa duha ka sagunson nga daog sa Star sa miaging semana diin siya mi-average og 25.5 puntos ug 5.0 rebounds nga daku og naambag sa pag-angkon nila og luna sa Philippine Cup quarterfinals.
Human mabokya sa unang kuwarter, si Maliksi kalit lang nanginit dayon na ngadto sa pagkadlit og season-high 26 puntos sa 111-95 nilang demolisyon sa Blackwater Elite niadtong Miyerkules. Tulo ka adlaw ang milabay, milansang siya og 17 sa iyang 25 puntos sa first half nga maoy migiya sa Star ngadto sa 120-73 nga demolisyon sa Meralco.
Mao kini ang nagtuboy ni Maliksi aron pagbira sa labing una niyang Accel-PBA Press Corps Player of the Week. Iyang gipukan sa maong pasidungog sila si Alex Mallari, ang kanhi niya teammate nga karon atua na sa Mahindra, Kevin Racal sa Alaska, JuneMar Fajardo sa San Miguel, Terrence Romeo sa GlobalPort ug Roger Pogoy sa TNT KaTropa. (BANAT NEWS)
- Latest
