CEBU, Philippines - Ang Pinoy’ng boksidor nga si Joey Canoy lumad gikan sa dakbayan sa General Santos miasdang na didto sa South Africa aron atubangon ang labing lisud nga tahas sa iyang karera. Iyang gikauban sa pagbiyahi ang trainer niyang si Brix Flores ug ang kapikas niining si Joy.
Bug-at nga misyon ang pas-anon ni Canoy sa iyang paghagit ni Hekkie ‘Hexecutioner’ Budler alang sa bakanteng International Boxing Organization (IBO) flyweight title karong Pebrero 4 didto sa Gauteng, South Africa.
Ang 23-anyos nga si Canoy dunay rekord nga 12-2-1 uban ang 6KOs, samtang si Budler nagbitbit og 32-2, 9KOs.
Si Canoy, ang kasamtangang Philippine Boxing Federation (PBF) minimumweight champion midaog sa katapusan niyang duha ka away batok sa mga kababayan niyang si Fabio Marfa ug Toto Landero. (BANAT NEWS)