CEBU, Philippines - Wa’y kaluoy nga gibalian og pako sa University of Cebu (UC) Junior Webmasters ang bisitang Sarawak Eagles gikan sa Malaysia, 78-48 aron pagsakmit sa Under-17 title sa Cebu Friendship Invitational Basketball Cup 2016 niadtong Miyerkules sa gabii didto sa Cebu Coliseum.
Ang Junior Webmasters ni coach Joevir ‘Brad’ Samonte naglabaw lang og dos puntos sa unang 10 minutos sa duwa, 16-14, apan mipabuto kini og makabungog nga 22-9 nga bomba sa ikaduhang kuwarter aron pag-abante og 15 puntos sa halftime, 38-23.
Misamot pa og kainit ang Junior Webmasters dayon na sa pag-inat sa ilang labaw ngadto na sa 24 puntos, 56-32 nga maoy nakapabarag og maayo sa Eagles sa nahabiling bahin sa duwa.
Si Froilan Mangubat, nga maoy gikoronahang MVP ug Luigi Gabisan maoy nangu sa UC sa managsamang 17 puntos, samtang si Kyle Ordeneza miamot og 11 puntos.
Si David Ho mikadlit og 10 puntos alang sa Sarawak. Pildero man tuod, apan ang mga Malaysians mopauli sa ilang nasud bitbit ang maanindot nga kasinatian ug makahuloganon nga leksiyon nga seguradong makatabang kanila sa ilang kampanya sa Malaysia U17 National Championships nga sugdan sunod semana.
“That’s what I told them, that Cebu basketball is way ahead of them. UC opened up their eyes that being big, being tall, being fundamentally sound and run back fast on defense are not enough to win championships,” matud pa sa Sugbuanong head coach sa Sarawak nga si Britt Carlo Reroma nga labing mahinumduman human gigiyahan ang University of San Carlos Warriors sa labing una niining major basketball title sud sa 58 ka tuig.
“UC played harder, tougher, fast-paced and very organized both in offense and defense. We really learned something from this experience and hopefully we can translate that into championship in Malaysia,” dugang pa ni Reroma.
Duna hinuo’y konsolasyon si Reroma human ang iyang Sarawak men’s squad milatos sa USC Warriors, 81-69 aron pagpahiluna sa ikatulong dapit sa men’s open division nga gidominar sa Team Bogo City human gipakgang ang SG/ARQ Builders, 65-57, aron pagkumpleto og four-game sweep. (BANAT NEWS)