Cebu nagmadaugon sa PSTA

CEBU, Philippines - Nakalangkat og  major award sa  1st Philippine Sports Tourism Awards (PSTA) ang dakung kalihukan  sa paugnat sa kusog nga gipahigayon dinhi sa Sugbo kaniadto.

Atol sa awards night  sa miaging gabii nga gipahigayon didto sa   Resorts World Manila,  ang The Ironman 70.3 (2015) maoy napili nga “Event of the Year-International”, samtang ang Province of Cebu maoy nakaangkon sa titulo nga “Destination Marketing of the Year”.

Napili usab nga “Organizer of the Year-Private” ang Sunrise Event, Inc.  nga maoy usa sa mga nagpaluyo sa maong kalihukan.

Nakadaog usab ang  Municipality of Tabuelan, Cebu  ug nakuha niini ang   “Event of the Year Award-Domestic” alang sa gidumala nila nga  Tabuelan 111.

Personal gyud nga nidawat sa award  si Mayor Rex Casiano Gerona.

Ang ubang mananaog naglangkub  sa  Clark Development Corporation (Destination of the Year), Municipality of Lubao, Pampanga (Organizer of the Year-Government), Philippine Inter-Island Sailing Foundation (Sport Association of the Year), Resorts World Manila (Event Sponsorship of the Year) ug Philippine Rugby Football Union/Fat Boy 10s Rugby (Charity Event of the Year).

Ang 1st Philippine Sports Tourism Awards (PSTA)  namugna alang sa paghatag og rekognasyon sa mga institusyon o mga government units nga nagdumala ug nakatampo sa  nagkadaiyang kalihukan sa paugnat sa kusog. (BANAT NEWS)