PHL Azkals tagak sa Suzuki Cup 2016

CEBU, Philippines - Dili maayo ang agi sa kampanya sa Phl Azkals sa 2016 AFF Suzuki Cup dihang gitagak sila sa defending champion  Thailand, 0-1 sa  ilang duwa sa miaging gabii didto sa Philippine Sports Stadium didto sa Bulacan.

Importante kaayo  ang daog sa Azkals kay mohatag unta  kini nila og  luna alang sa second round human   miresulta sa ‘draw’ ang unang duha nila ka duwa batok sa Indonesia ug Singapore.

Naningkamot hinuon ang Azkals batok sa lig-ong Thailand, apan milugak ilang depensa  sa ika-81 minutos nga gipahimuslan ni Thai striker Sarawut Masuk nga mipasud sa iyang goal. Gisuwayan sa Azkals nga matabla ang duwa, apan wala na sila kahimo pa og goal hangtod nahurot ang oras.

Daw nakita ang taas nga kompiyansa sa mga Thais nga modaog batok sa host team dihang gipapahuway nila ang ilang mga top players. Ang Thailand mitapos sa group stage nga wa’y pilde, gisundan  sa Singapore nga adunay usa ka daog ug usa ka tabla. Ang Indonesia natagak usab sa group stage tungod sa ilang duha ka pilde.

Ngil-ad ang resulta sa maong kampanya sa Azkals ni coach Thomas Dooley tungod kay daghan ang naglaum nga mosulod sila sa finals karon nga edisyon human sa duha ka sunod-sunod nila nga semis appearance sa Suzuki Cup. (BANAT NEWS)