CEBU, Philippines - Human matanggong og usa ka adlaw gumikan sa bagyong Marce, ang Team Cebu City nga gilangkuban og 320 ka mga sakop nakabiyahi na gyud padung sa Davao alang sa Philippine Youth Games-Batang Pinoy Championships nga mosikad ugmang adlawa didto sa Tagum City.
Gawas sa TCC Niños, lain pang delegasyon gikan sa Sugbo nga mokumbati sa maong torneyo nga gipasiugdahan sa Philippine Sports Commission mao ang Tribu Lapu-Lapu, Mandaue, Talisay ug Cebu Province.
Sa kinatibuk-an, 26 ka matang sa paugnat sa kusog ang kumbatihan. Kini mao ang archery, arnis, athletics, badminton, baseball, basketball, boxing, chess, cycling, dancesport, judo, karatedo, tennis, pencak silat, rugby football, sepak takraw, softball, swimming, table tennis, gymnastics, taekwondo, volleyball, weightlifting, wushu ug wrestling.
Gawas sa gymnastics ug wushu, ang tanang events adto banatan sa Tagum.
Ang gymnastics ipahigayon karon pang Disyembre 4-11 didto sa Rizal Memorial Sports Complex, samtang ang wushu gikatakda karong Disyembre 5-6 didto sa Ninoy Aquino Stadium sa kaulohan. (BANAT NEWS)