Convergys, Supportsave nakauna sa E-League finals

CEBU, Philippines - Ang defending champion Convergys Converters ug Supportsave Dragons mipakgang sa tagsa-tagsa nila ka mga kontra aron pagtikang ngadto sa usa na lang ka daog aron sakmiton ang kampiyonato sa ilang dibisyon sa 12th CSCC E-League men's basketball tournament niadtong Sabado didto sa City Sports Club-Cebu gym.

Si Franz Dysam mitapos og 14 puntos ug tulo ka assists, si Lourenz Limpangog midugang og 12 puntos uban ang unom ka rebounds ug tulo ka assists alang sa Converters nga maoy unang mipadanak og dugo batok sa Lexmark Stallions, 59-48, sa ilang best-of-three series alang sa Elite Classic title.

Midugang si Aldene Jay Batino og 10 puntos, walo ka rebounds ug duha ka steals alang sa Converters, nga migamit og makapakugang nga 23-6 rally sa ikatulong kuwarter aron pagbugha sa Stallions.

Sa Evo League, ang Dragons nanginit og maayo sa katapusang hunat sa duwa aron pagpatikalbong sa Tech Mahindra Tech Mighties, 75-63, aron pagposte sab og 1-0 ka bintaha sa kaugalingon nilang serye.

Sila si Nino Belande, Justin Marie Mier ug Germain Jo Guarisma nagkumboya og 46 puntos alang sa Dragons nga alkansi og tres puntos human sa ikatulong kuwarter, 48-51, apan milusad og nagbagang ataki sa nahibiling 10 minutos sa duwa  aron pagpaluhod sa Tech Mighties.

Doble ang kalipay nga natagamtaman ni Belande gumikan kay siya man maoy gipasidunggan nga season MVP ug ingon man scoring champion sa Evo League. Susama sab nga dungog ang naangkon ni Archie Batua sa Accenture Sharks sa Elite Classic. EBV (BANAT NEWS)