CEBU, Philippines - Miagi pa og overtime ang Larrobis una nila maangkon ang kadaugan batok sa D’ Lurics Enterprises, 81-76 sa Triple-A Christmas League 2016 niadtong Domingo didto sa Kimwa gym sa Barangay Subangdaku, dakbayan sa Mandaue.
Mao kini ang unang daog sa Larrobis sud sa tulo nila ka duwa.
Si Rechel Bamba maoy topscorer sa Larrobis nga mikamada og 22 puntos, gisundan ni Richard Madrid lakip, ang krusyal nga 3-pointer nga maoy naghatod sa duwa ngadto sa overtime.
Laing nakahimo og double digits sa Larrobis mao sila si Canjo Echavez ug Ramil Estremos sa ilang 12 ug 11 puntos.
Nagdanga-danga na unta sa kadaugan ang D’ Lurics dihang naglabaw sila, 66-63 sa katapusang 40 segundos sa regulasyon, apan si Madrid miposa og usa ka 3-pointer aron matabla ang iskor, 66-all sa nahabiling 10 segundos.
Gihatagan unta og higayon ang D’ Lurics nga mokawat sa daog, apan si Geryl Bukiron misipyat sa iyang 3-pointer hinungdan sa overtime.
Sa dugang singko minutos, padayong nagsinukliay og mga puntos ang duha ka kampo, apan si Estremos mitusak og lima ka sunod-sunod nga puntos nga nakapalabaw sa Larrobis, 75-73 ug kontrolado na nila ang duwa sukad niadto.
Si Alexam Amaga maoy mikayod og maayo sa final period aron mangu sa D’ Lurics Enterprises sa iyang 14 puntos, ang team owner nga si Dodong Lurica mitampo og 10 puntos. Nagtampohay sab og 10 puntos sila si Rex Gonzaga ug Maclot Echavez sa D’ Lurics Enterprises ni playing coach Dodong Taborada.
Sa laing aksiyon, nagmangtas og maayo si Tawing Grafe aron pangulohan ang Monterroyo pagpukan sa Salt City, 75-57.
Si Grafe miburak og 28 puntos, si Jimmy Monternel mikadlit og 16 puntos, samtang si team owner Dr. Raul Monterroyo miambit og 10 puntos alang sa iyang team, kansang kadaugan nagpangamay na sa hinapos nga bahin sa third period human sila milabaw og 24 puntos, 54-30.
Wala man tuod sa kondisyon si Reyden Villaronza, apan nakahimo gihapon siya sa pagpangulo sa iyang koponan pinaagi sa iyang 10 puntos.
Ang Monterroyo ni Dr. Monterroyo ug ang Salt City nilang Villaronza ug Toycar Cardoza pareho na karon nga nagbitbit og 2-2 nga baraha ning maong liga nga gipahigayon ubos sa pagtugot ni Triple-A president Gilbert Lesin.
Ang mga duwa gidumala nilang league commissioners Crismart Martinito ug Jun Arceo inabagan ni Orly Navarro. (BANAT NEWS)
PUNTOS MATAG USA
Unang duwa:
LARROBIS (81) – Bamba 22, Madrid 15, E. Echavez 12, Estremos 11, Pacquiao 7, Baldago 6, Ouano 4, Larrobis 2, Baclay 2.
D’ LURICS (76) – Amaga 14, Lurica 10, Gonzaga 10, M. Echavez 10, Englis 8, Bukiron 8, Gacasan 4, Ferolino 3, Cabahug 3.
Ikaduhang duwa:
MONTERROYO (75) – Grafe 28, Monternel 16, Monterroyo 10, Mendoza 6, Bronoco 4, Manatad 3, Magale 2, Yu 2, Abong 2.
SALT CITY (57) – Villaronza 10, Gorgonio 8, Jarlata 8, Ocier 7, Cardoza 6, Varro 6, Cabucos 5, Armamento 4, Cabucos 3.