Donaire pakyas pagdepensa sa bakus
CEBU, Philippines - Luyo sa kalipay sa mga Pinoy boxing fans human sa kadaugan ni Manny Pacquiao, unang mibati og kaguol human napakyas ang five-division world champion nga si Nonito Donaire Jr. pagpanalipod sa iyang WBO super bantamweight title batok sa Mexican challenger nga si Jessie Magdaleno kagahapon didto sa Thomas & Mack Center sa Las Vegas.
Si Donaire nahubuan sa bakus human midaog pinaagi sa unanimous decision ang mas batan-on nga si Magdaleno, 116-112, 116-112 ug 118-110.
Miresulta og bati ang hinay nga sugod ni Donaire diin migawas nga mas agresibo ang batan-ong Mehikano. Way kahadlok nga midasdas si Magdaleno gamit iyang mga hooks aron paatrason si Donaire sa pisi.
Nakaigo hinuon og mga counter punches ug hait nga jabs si Donaire ngadto ni Magdaleno, apan mipakita og kalig-on ang challenger ug kapila usab niya gibombahan si Donaire.
Sa interview human sa fight, gipamugos ni Donaire nga siya ang angay mudaog sa away tungod kay nagtuo siya nga mas daghan siya og solidong kinumo nga gipasulod itandi ni Magdaleno. "We definitely won the fight. Losing this never crossed my mind. I can't believe it," matud pa sa Fil-American boxer sa Philstar.com.
Hinuon sa nahitabo sa round 9, tataw nga nakabintaha sa sinukliay sa kumo si Magdaleno diin gipauwanan niya og mga kinumo si Donaire kinsa daw mibati sa kakusug sa mga gibuhian ni Magdaleno.
Sa maong kadaugan, si Magdaleno misaka sa record nga 24-0, 17KOs, samtang si Donaire nakatilaw sa ikawalo niyang pilde sud sa 45 ka away. (LPM) (BANAT NEWS)
- Latest
