Wade misalida dayon sa Bulls

CEBU, Philippines - Misalida dayon si Dywane Wade sa bag-o niyang team human midaro  og 22 puntos aron pagtuboy sa Chicago Bulls ngadto sa 105-99 nga kadaugan batok sa Boston Celtics sa ikaduhang adlaw sa  2016-2017 NBA  season kagahapon didto sa United Center sa Chicago, Illinois.

Human gi-’trade’ si Derrick Rose ngadto sa New York Knicks, ang Bulls mipanday og lig-ong puwersa pinaagi sa pagkuha nilang Wade ug Rajon Rondo.

Tuod man, si Wade mihimo dayon og impresiyon pinaagi sa paglansang og upat sa unom niya ka 3-pointers sa labing una niyang duwa sul-ob ang uniporme sa Bulls. Ang iya sab nga itsada maoy nagselyado sa daog sa Bulls, 104-99 sa nahabilin nga 26 segundos sa duwa.

Si Jimmy Butler mitapos og 24 puntos sa Bulls, si Nikola Mitoric mikadlit og 15 puntos, samtang si Rondo miamot og kuwatro puntos ug siyam ka assists.

Wala sab magpabitin ang forward nga si Taj Gibson nga mipupo og 18 puntos ug 10 rebounds agi’g pagmatuod nga angayan gyud siyang ma-starting five sa Chicago.

Samtang sa ikaduhang sunod-sunod nga higayon, si Kawhi Leonard maoy nahimong bida sa San Antonio Spurs, ning higayona sa ilang 102-94 nga kadaugan batok sa Sacramento Kings.

Gumikan niini, namansahan dayon og kapildihan ang bag-ong homecourt arena sa Sacramento.

Human mipabuhagay og career-high 35 puntos ug lima ka steals sa 129-100 nilang pagkastigo sa Golden State Warriors, pabiling nanginit si Leonard aron pagkadlit og 30 puntos ug lima ka steals batok sa Kings.

Sa gipakita niyang enerhiya, usa sa mga misaludo ni Leonard mao ang bag-ong kaplag nilang big man nga si Pau Gasol.

Sa lain pang mga duwa, ang Atlanta Hawks midagit  sa Washington Wizards, 114-99 ug ang Los Angeles Clippers mipilde sa Portland TrailBlazers sa iskor nga 114-106. (BANAT NEWS)