Walay kasingkasing, wa’y tsansa

CEBU, Philippines - Kun wa’y kasingkasing, wa’y tsansa.

Mao kini ang pilosopiya nga nagdan-ag sa dalan sa University of Cebu Junior Webmasters ngadto sa ikaduha niining sunod-sunod nga pagtaak sa finals sa Cebu Schools Athletic Foundation, Inc. men’s basketball tournament.

Usa ka tan-aw sa mugbo ug gagmay kaayo nilang line-up dili ka magtuo nga sila usa ka lehitimong championship contender.

Apan unsa’y kakulang nila sa gidak-on ilang gitapakan sa gidak-on sa ilang kasingkasing matag duwa hinungdan nga ilang naangkon ang respeto sa ilang mga karibal.

Sa kanunay, ang Junior Webmasters madasigon nga moatubang sa matag hagit nga mohapak sa ilang dalan. Usa sa mga mahinungdanon nilang kadaugan mao ang pagtagak sa nagkalig-on nga Don Bosco Greywolves. Labaw sa tanan, sila sab maoy bugtong team nga nakapilde sa three-time defending champions Sacred Heart School-Ateneo de Cebu Magis Eagles dili lamang kausa, apan duha gyud ka higayon karong season.

Sa ilang pagmartsa sa tinguha nga makab-ot ang makasaysayanong titulo, ang Junior Webmasters mag-atubang na sab og pamilyar nga kontra nga mao ang Magis Eagles nga seguradong naglungot-lungot nga makabawos kanila.

Bisan tuod og kaduha nila napiog ang Ateneo, si UC juniors head coach Joever ‘Brad’ O. Samonte taas gihapon kaayo og respeto sa Magis Eagles bisan tuod og sa susamang higayon mapasigarbuhon siya sa iyang mga batos.

“Ateneo is a very strong team due to their three-time exposure  to championship. Also, their players are bigger than mine,” matud pa ni Samonte. “I’m just proud to say that my players may be shorter in height, but they all have big fighting hearts.”

Sayod ang 36-anyos nga si Samonte nga lisud ikabangga ang Magis Eagles, apan andam sila   kun unsa man gani ang ipresenta sa ilang kontra sa umaabot  nilang best-of-three finals series nga sugdan karong Biyernes.

Kun duna man gani sila’y hait nga hinagiban nga ikaparang sa Magis Eagles, si Samonte nagkanayon nga kini wa’y lain mao ang ilang kasingkasing. (BANAT NEWS)