TUPI, SOUTH COTABATO, Philippines – Ang mga Pinoy’ng boksidor nga sila si Romero ‘Dynamite’ Duno ug Reymart ‘Assassin’ Gaballo wala kaayo paningta sa dihang gipangpilde ang Thai nilang kontra, samtang lain pang duha ka batos sa Sanman yanong mipulbos sa ilang mga kontra sa “Battle of Tupi” niadtong Sabado sa gabii dinhi sa Tupi municipal gym.
Si Duno mipakamang dayon ni Paiboon Lorkam sud lamang sa duha ka hugna aron pagsakmit sa WBC Asia super featherweight title, samtang si Gaballo mipatikangkang ni Manot Comput sud lamang sa unang hugna aron pagbira sa WBC Asia super bantamweight belt.
Gitumba ni Duno si Paiboon tulo ka higayon sa wala pa kini niya hingpit nga gipatukay-ang sa oras nga 2:14 sa ikaduhang hugna aron pag-inat sa iyang rekord ngadto sa 11-1 uban ang 10KOs.
Sama ni Duno, si Gaballo miyagyag sab og makalipong nga kusog aron pagpatikyaob ni Comput sa oras nga 1:49 sa unang hugna.
Si Gaballo nga nagbitbit na og 15-0 record uban ang 13KOs, naglantaw na nga mag-training sa Amerika segun sa gisaad ni Sanman Promotions President ug CEO Jim Claude ‘JC’ Manangquil.
Makig-uban ni Gaballo ang iyang stablemates nga sila si John Vincent ‘Mulawin’ Moralde (17-0, 7KOs) ug ‘Magic’ Mike Plania (11-0, 4KOs) nga miselyado sa ilang biyahe padung Amerika human midaog pinaagi sa first- round KO batok nilang Hagibis Quiñones ug Jhon Rey de Asis. (BANAT PALARO)