CEBU, Philippines - Gilihian og sakit nga kapildihan ang Gilas Pilipinas 5.0 human sila gilampurnas sa India, 83-91 sa FIBA Asia Challenge kagahapon didto sa Tehran, Iran.
Ang Gilas nga gilangkuban sa mga collegiate standouts ug amateur players milabaw og siyam, 25-16 sa first quarter, apan wala sila kapanagang sa kalit nga ataki sa mas tag-as nga mga Indian atol sa second half.
Kapila milusad og rally ang mga Indian nga gibidahan nila ni 7-footer Amritpal Singh ug shooter Vishesh Bhriguvanshi hinungdan nga wala kabawi ang mga Pinoy.
Sunod nga sangkaon sa Gilas Pilipinas 5.0 mao ang Chinese-Taipei.
Si Mac Belo maoy nangulo sa Gilas cadet sa iyang 21 puntos, samtang sila si Ed Daquioag ug Russell Escoto mitampo og 15 ug 11 puntos matag usa.
Ang Gilas kinahanglan nga modaog og kaduha aron moabante sa second round diin magpaabot kanila ang mga powerhouse Asian teams sama sa Iran, Jordan ug China. (BANAT PALARO)