A+EBA 2016 Corporate Cup mosikad na karong adlawa

CEBU, Philippines - Unom ka teams ang mag-ilog sa korona sa dihang ang Architects+Engineers Basketball Association 2016 Corporate Cup mosikad na diha sa Chiang Kai Shek gym sa Cebu Eastern College.

Sa dili pa ang duwa sud sa korte, usa ka simpleng seremonyas sa pagbukas ang ipahigayon sa alas- 8:30 sa buntag. Gawas sa tradisyonal nga parada sa mga atleta, lain pang molamas sa programa mao ang paghagpat sa best muse.

Si A+EBA president Paolo Alberto nagkanayon atol sa pormal nga paglusad sa torneyo sa miaging gabii didto sa Handuraw Pizza-Gorordo nga ang tanang mga players kinahanglan nga motambong sa opening. Kadtong dili motunga pahamtangan og usa ka duwa nga suspensiyon gawas kun duna sila’y balido nga rason.

Gipangulohan sa defending champion Megabond, lain pang mobanat mao ang Davies Paints, Phoenix Building Systems, Sea Olympus, Fenestram Fabricators Co. ug Dormakaba.

Magtigi sila ubos sa double round robin format diin barangayan system ang gamiton aron paghatag og kahigayonan nga makaduwa ang tanan.  Ang top 4 human sa eliminasyon moabante ngadto sa crossover semifinals diin ang No. 1 ug No. 2 teams dunay twice-to-beat  advantage.

Ang mga mananaog maoy magsangka sa kampiyonato sa usa ka best-of-three series. (BANAT PALARO)