Fernandez O.K. sa PSC, apan...

CEBU, Philippines - Si Philippine basketball legend Ramon ‘El Presidente’ Fernandez nagkanayon nga andam siyang modawat sa posisyon isip Philippine Sports Commission chairman ubos sa duha ka kondisyon.

Una mao nga anhi siya mag-opisina sa Sugbo ug ang ikaduha, itanyag kaniya ang posisyon.

Mao kini ang reaksiyon ni Fernandez sa mga migawas nga taho diin ang iyang pangan naapil isip usa sa mga kandidato nga sunod molingkod isip PSC chairman. Lain pang  gisaytan sa maong puwesto mao sila si incumbent PSC chair Richie Garcia, Rain or Shine coach Yeng Guiao ug kanhi Philippine Olympic Committee president Cristy Ramos.

Matud pa ni Fernandez nga dili kaayo siya sersoyo sa sinugdanan, apan sa kadugayan iya kining gitimbang-timbang gumikan sa awhag sa pipila ka mga grupo ug higala nga nagtan-aw nga kwalipikado kaayo siyang mohupot sa labing taas nga puwesto sa labing taas nga organisasyon nga nagpadagan sa paugnat sa kusog sa nasud.

“Several groups have called me up to go after it (PSC chairmanship), but I will only do it on two conditions. First, I must hold office here in Cebu,”  matud pa ni Fernandez, ang kanhi four-time PBA Most Valuable Player. “Secondly, I won’t have to apply for it. The position must be given to me freely.”

Gipasabot ni Fernandez nga dili siya moaplay sa maong posisyon kay basi’g lainon unya og sabot sa uban nga nangayo siya og pabor ilabi na kay usa siya sa hugtanong misuporta sa kandidatura ni President-elect Rodrigo Duterte sa milabay nga eleksiyon.

Nagkanayon si Fernandez nga kuntento ug malipayon na siya karon sa pribado niyang kinabuhi, apan gusto gihapon niya makatabang alang sa kaugmaran sa Philippine sports kun hatagan og higayon.  (BANAT PALARO)