Asian MTB c’ShIPS mosikad karon
CEBU, Philippines - Mosikad na ang aksiyon sa 2016 Asian Mountainbike Invitational and Philippine National Championships karong adlawa didto sa Danasan Eco-Adventure Park sa Danao City.
Unang tigian karon mao ang cross-country competition ug pagka ugma mao ang downhill race.
Si Cebuano John Renee Mier maoy mangulo sa mga contender gikan sa nasud nga molumba sa men’s elite. Magsagubang siya og lisud nga hagit gikan sa iyang mga kaatbang lakip na si Alvin Bebosa. Moapil usab ang mga Indonesian elites nga sila si Bandi Sugito ug Chandra Rafsanjani.
Dili lang sa men’s elite, anaa usab ang mga female Indon riders nga sila si Kusmawati Yasid ug Nunung Sukarni mosuway paglangkat sa korona sa women’s elite.
Mga Pinay nga manalipod sa ilang balwarte naglakip nilang Ariana Dormitorio, Gica Limjoco, Mellisa Jaroda ug Ana Katrina Angelo.
Laing kategoriya nga tigian sa cross-country naglakip sa men’s open, men’s junior, masters 30-39 ug masters 40-above.
Sa laing bahin, ang downhill competition gilangkuban sa men’s elite, men’s master, 17-19, 20-29, 30-39 ug 40-above age-group.
Ang duha ka adlaw nga torneyo gipasiugdahan sa Philcycling uban sa suporta sa Danao City Government ug Union Cycliste Internationale. (BANAT PALARO)
- Latest
