CEBU, Philippines - Panimawos maoy anaa sa huna-huna ni kanhi two-time world title challenger Milan ‘El Metodico’ Melindo (33-2, 12KOs) sa ALA Boxing Gym sa dihang iyang sangkaon pag-usab ang Mehikano niyang karibal nga si Javier ‘Cobra’ Mendoza (24-3-1, 19KOs).
Ang dumot nilang rematch maoy supporting main event sa umaabot nga pagdepensa ni Donnie ‘Ahas’ Nietes sa iyang WBO light flyweight title batok sa Mehikanong challenger nga si Raul Garcia sa “Pinoy Pride 36: A Legend in the Making” fight card nga gikatakda karong Mayo 28 didto sa University of St. La Salle Coliseum sa dakbayan sa Bacolod.
Si ALA Promotions President ug CEO Michael P. Aldeguer mitug-an sa Banat News kagahapon nga kompirmado na ang maong rematch gumikan kay pareho nang nakapirma og kontrata ang duha ka boksidor.
Dugang pa ni Aldeguer nga ang away nilang Melindo ug Mendoza usa ka IBF light flyweight eliminator diin ang modaog maoy mamahimong mandatory challenger sa kasamtangang IBF champion nga si Akira Yaegashi sa Japan.
Si ALA chief trainer Edito Villamor gibati og tumang kalipay nga mahinayon gyud ang rematch.
“We’re very thankful to ALA Promotions because after tough rounds of negotiations they were able to pull it off and bring the fight here in the Philippines,” matud pa ni Villamor. “Mendoza is a tough fighter. We just have to prepare Melindo to be the best he could possibly be and make sure he's in top condition going into the match.”
Naputos sa kontrobersiya ang una nilang engkuwentro diin si Melindo napilde pinaagi sa kuwestiyonableng technical decision sa ikaunom nga hugna batok ni Mendoza sa ilang IBF light flyweight title bout niadtong Mayo 30 didto sa Campo Nuevo Ensenada sa Baja California, Mexico.
Gawas ni Melindo, si ‘King’ Arthur Villanueva (28-1, 14KOs) mopakita sab sa iyang abilidad sa maong blockbuster card didto sa gibansagan nga “City of Smiles” batok sa Mehikanong kampiyon nga si Juan Jimenez (22-9, 15KOs), nga mihaw-as gikan sa tulo ka sunod-sunod nga daog pinaagi sa knockout.
Sa laing bahin, ang “Pinoy Pride 36” pormal nga ilusad karong alas-11 sa buntag diha sa The Social sa Ayala Center Cebu diin sila si Nietes, Melindo ug Villanueva ang motambong sa maong kalihukan. (BANAT NEWS)