Gimik dalang panungog ni Pacman

Wala pa gani mohupay ang mga kontrobersiya nga iyang giatubang, mihimo na sab og laing kasikas si Manny Pacquiao usa ka semana human siya mitaak og balik didto sa Amerika.

Atua karon si Pacquiao sa Los Angeles aron didto himuon ang katapusang hunat sa iyang preparasyon alang sa ikatulo nilang sangka ni Tim Bradley nga gikatakda karong Abril 9 didto sa MGM Grand sa Las Vegas.

Iyang gibawon didto ang pipila ka sensitibong mga isyu nga lagmit makaapekto sa iyang kandidatura pagka-Senador sa Pilipinas sa bugnong lugaynon karong Mayo 9.

Nag-una niini mao ang malaha niya komentayo kabahin sa same-sex marriage nga nakasamad sa balatian sa mga sakop sa Lesbian, Gay, Bisexual and Transgender (LGBT) community sa nagkadaiyang dapit sa kalibotan.

Ikaduha mao ang reklamo nga gisang-at batok kaniya sa iyang mga kaatbang sa politika didto sa buhatan sa Comelec.

Dunay midemanda nga iuswag o di ba kanselahon usa ang iyang away batok ni Bradley samtang dunay mga nagtinguha nga dili ipasalida ang ilang away tibuok Pilipinas kay lagi makahatag man kini kaniya og bentaha batok sa ubang mga kandidato. Apan wala pa gani maresulba ang maong mga isyu, midagkot na sab og laing kontrobersiya si Pacquiao human gi-post sa dentistang si Dr. Ed de la Vega sa iyang Twitter account ang mouthguard nga gamiton unya sa eight-division world champion atol sa away.

Imbes bandila sa Pilipinas ang desinyo nga maoy iyang naandan, ang logo sa UNA kon United Nationalist Alliance, ang politikanhong partido ni Pacquiao ubos sa liderato ni Bise Presidente Jejomar Binay mao man ang nidayan-dayan sa iyang mouthguard.

Segurado ako nga  bahaon na sab og mga pagsaway sa iyang mga kontra ni Pacquiao sa iyang gibuhat.

Apan dili bogo si Pacquiao paghimo sa maong lakang. Sa akong pagtimbang-timbang, kabahin lamang kini sa politikanhong gimik nga giandam sa iyang mga tawo kay bisan og kini negatibo sa tan-aw sa uban, makahatag gihapon kini kaniya og lapad nga publisidad.

Kun atong lantawon og maayo, maora’g nanungog lang si Pacquiao sa iyang mga kaatbang ug kritiko.

Sa dili pa nila paghuton ang idolong boksingero, angayan usa nilang isilsil sa ilang alimpatakan ang pangutana nga gamiton ba gyud kaha niini ang maong mouthguard atol sa away. Kay basin sa kinauwahian masulod lamang sila sa laang nunot ning pagpanungog ni Pacman.

Kun dunay mga reaksiyon o komentaryo mahimong mo-email sa [email protected]