CEBU, Philippines - Daghan na og awards nga nadawat si two-division world champion Donnie ‘Ahas’Nietes, apan karong gabhiona gikatakda siyang modawat sa labing daku nga pasidungog sa iyang karera.
Kini gumikan kay si Nietes ibayaw man isip co-Athletes of the Year uban nilang five-division world champion Nonito ‘The Filipino Flash’ Donaire, Jr. ug golf star Miguel Tabuena sa Philippine Sportswriters Association (PSA) Awards Night nga himuon karon didto sa One Esplanade sa Pasay City.
Pila na ka higayon nga gipasidunggan si Nietes sa PSA, apan mao pa kini ang labing una nga siya maoy ‘Athlete of the Year’. Gumikan kini sa mabungahon niyang kampanya sa 2015 diin siya opisyal nga nahimong longest-reigning Filipino world champion human gibuak ang karaan na kaayong rekord ni anhing Gabriel ‘Flash’ Elorde nga naghari isip world lightweight champion sud sa pito ka tuig unom ka bulan.
Ang garbo sa ALA Boxing Gym nga lumad gikan sa Murcia, Negros Oriental nakadepensa sa iyang WBO light flyweight title tulo ka higayon sa miaging tuig.
Ang nag-unang duha batok nilang Gilberto Parra ug Francisco Rodriguez, Jr. Iya kining gisundan pinaagi sa impresibong kadaugan pinaagi sa unanimous decision batok sa Mehikanong si Juan Alejo sa makasaysayanong Pinoy Pride event sa Amerika niadtong Oktubre 17 didto sa StubHub Center sa California.
Gawas ni Nietes, pasidunggan sab ang Sugbuanong basketbolista nga si JuneMar Fajardo gumikan sa iyang kontribusyon sa Gilas Pilipinas ingon man pagkulit og kasaysayan isip labing unang player nga midaog og ‘Best Player of the Conference’ award sud sa tulo ka sunod-sunod nga higayon.
Ang back-to-back PBA MVP nga maoy labing dominanteng sentro karon sa nasud, usa sab sa mga hinungdan sa makasaysayanong kampanya sa San Miguel Beermen sa bag-ohay pang natapos nga PBA Philippine Cup diin sila mikulit og rekord isip labing unang team nga nakampiyon gikan sa 0-3 sa usa ka best-of-seven finals series. (BANAT PALARO)