CEBU, Philippines - Si Vivian Padawan temporaryo karong nag-una sa mga entrante nga naglaraw makaangkon og luna sa masters event sa 17th Sinulog Open National Bowling Tournament didto sa Gaisano Bowlingplex sa Barangay Banilad, dakbayan sa Sugbo.
Human sa tulo ka adlaw nga aksiyon sa singles, doubles ug team competition, si Padawan sa Bowlingplex Tenpin Association-PSCB maoy nakatigum sa labing taas nga puntos human mitumba og 1,325 ka pinfalls.
Milayat sa ikaduhang puwesto si Bede Ilano sa natali niining 1,310 pins, gisundan ni Boy Co nga adunay 1,281. Ang kanhi lider nga si Oscar Ornopia nanaog ngadto sa ikaupat uban sa iyang 1,277 puntos.
Sila si Padawan ug Tess Regino maoy nangu sa doubles event uban sa ilang 804 puntos, samtang si BTA President Bel Suelto ug Dede Ilano maoy nabutang sa ikaduha bitbit ang 801 puntos.
Sa team event, ang BTA nga gilangkuban nilang Xyrra Cabusas, Aui Padawan ug Bede Ilano maoy kasamtangang nag-una uban ang 1,252 puntos. (BANAT PALARO)