CEBU, Philippines - Ipamatuod sa mga rising boxing stars sa ALA Boxing Gym nga sila ang kaugmaon sa Philippine boxing sa ilang pakigsangka batok sa tagsa-tagsa nila ka mga langyaw’ng kaatbang sa ika-35 nga edisyon sa Pinoy Pride boxing series karong Pebrero 27 diha sa Pacific grand ballroom sa Waterfront-Cebu City Hotel and Casino.
Mobida sa maong fight card mao ang tulo sa mga umaabot nga boxing stars sa nasud nga sila si ‘Prince’ Albert Pagara, Mark ‘Magnifico’ Magsayo ug Kevin Jake ‘KJ’ Cataraja nga pulos nag-atubang og dagkung hagit nga ipamatuod nga may katakus sila nga sunod mohatag og dungog sa nasud pinaagi sa pagsakmit og mga world titles.
Si ALA Promotions President and CEO Michael Aldeguer miingon nga mahinungdanon ang maong fight card dili lang sa ALA Promotions, apan lakip na sa Philippine boxing tungod kay makita dinhi ang mosunod nga mga boksidor nga modala sa bandera sa nasud.
“I see this card as very significant not only to ALA Promotions but to Philippine boxing,” matud pa ni Aldeguer atol sa press conference kagahapon didto sa St. Mark’s Hotel.
“With (Manny) Pacquiao retiring very soon and we have Nonito Donaire and Donnie Nietes not getting any younger, I think this is a great time to show that we have these young boxers who are ready to carry the future of Philippine boxing.”
Dugang pa ni Aldeguer nga risgo ang ilang gibuhat sa pagparang sa ilang mga rising stars batok sa mga lig-ong kaatbang, apan mao kini ang bugtong paagi aron mapakita kun tinuoray na ba sila nga andam sa mas dagkung hagit sa ilang karera.
Ang WBO ranked No. 2 nga si Pagara (25-0, 18KOs) manalipod sa iyang WBO Intercontinental super bantamweight title batok ni Nicaraguan challenger Yesner Talavera (15-3, 4KOs). Ang iyang kadaugan mohatag kaniya og kahigayonan nga moaway sa main event sa laing Pinoy Pride card sa Estados Unidos sa Hulyo.
Sa supporting bout, si Magsayo (12-0, 10KOs), ang WBO Youth featherweight misaad og knockout nga kadaugan batok ni Mexican Eduardo ‘Fierita’ Montoya (17-4, 13KOs), samtang si Cataraja (2-0, 2KOs) moharong sa labing lisud nga hagit sa iyang batan-ong boxing career sa iyang pakigsangka sa labing una niyang Mehikanong kaatbang nga si Tony Rodriguez.
Sa undercard, laing tulo ka mga masaarong ALA fighters ang masuwayan usab dihang si Melvin ‘Gringo’ Jerusalem (8-0, 7KOs) moharong ni former world champion Florante Condes (27-9, 23KOs), si Jeo ‘Santino' Santisima (8-2, 7KOs) makigbatok ni veteran brawler Marco Demecillo (21-4, 16KOs), samtang si Elmo 'Bisdak' Traya (10-1, 8KOs) makigbinukbukay ni Mindanao brawler Romeo Jakosalem (16-11, 8KOs). (BANAT NEWS)