CEBU, Philippines - Gawas sa Central Visayas Regional Athletic Association (CVIRAA) Meet nga banatan sa dakbayan sa Naga sunod semana, ang Sugbu mao sab ang mo-host sa Private Schools Athletic Association (PRISAA) Regional Meet karong Pebrero 27-29.
Sa gihapon, tulo ka probinsiya nga naglangkob sa rehiyon ang mainit nga magkumbati alang sa kampiyonato. Gawas sa mga Sugbuanon, mga atleta gikan sa Bohol ug Dumaguete mopakita sab og aksiyon.
Bisan og maoy host, dili angayan nga mokompiyansa ang Sugbu gumikan kay ang Negros Oriental, diin kabahin ang Dumaguete, sagad man mopadala og lig-ong teams sa volleyball, football, athletics ug swimming.
Ang tulo ka adlaw nga kompetisyon magsilbeng eliminasyon aron paghagpat og mga tadhang atleta nga maoy mopresenta sa Region VII alang sa PRISAA National Games karong Abril didto sa Koronadal City, South Cotabato.
Duha ka tuig ang milabay, ang Central Visayas gibayaw ngadto sa PRISAA Hall of Fame human gidominar niini ang National Championships sud sa upat ka sunod-sunod nga tuig. (BANAT SPORTS)