Pacman, Tim nag-abot na

CEBU, Philippines – Kalmado kaayo nga miinsister si Pinoy ring superstar Manny Pacquiao  nga moretiro na siya human sa iyang away batok ni WBO welterweight champion.

Ang duha ka boksidor nag-abot kagahapon  adlawa didto sa Beverly Hills Hotel sa California alang sa unang bahin sa ilang Press Tour aron i-promote ang ikatulo nilang sangka nga gikatakda karong Abril 9 didto sa MGM Grand sa Las Vegas, Nevada.

Matud pa sa bugtong eight-division world champion sa kasaysayan nga panahon na aron siya molabay sa katapusan niyang suntok ug iyang ikalipay nga isab-it na sa hingpit ang iyang mga gloves human sa ilang sangka ni Bradley.

Wala hinuon mokagat si Top Rank chairman Bob Arum sa pasiatab ni Pacquiao kay alang kaniya wa’y kasiguroan ang dagan sa huna-huna sa usa ka boksidor.

Mao kadto ang labing unang pag-atubang ni Pacquiao sa publiko aron maghisgot og boksing siyam ka bulan human siya gipilde ni Floyd Mayweather, Jr. pinaagi sa unanimous decision sa kontrobersiyal nga “Fight of the Century” niadtong Mayo 3 sa miaging tuig didto sa Las Vegas.

Hangtod karon gibati ni Pacquiao nga siya maoy daog sa labing daku nga kasaysayan sa boksing, apan mura’g wala na siya’y interes pa nga makig-rematch ni Mayweather kay pareho na silang retirado unya. Sila si Pacquiao ug Bradley mag-abot pag-usab karong Biyernes alang sa katapusan nilang press conference didto sa Madison Square Garden sa New York. Mobalik dayon siya sa Pilipinas aron ihan-ay ang iyang training camp alang sa katapusan nga away sa iyang karera. (BANAT NEWS)