Rio Olympics sunod target ni Tabal

CEBU, Philippines – Human gidominar ang 21K women’s open sa 2016 Standard Chartered Hong Kong Marathon niadtong Domingo didto sa Victoria Park, sunod nga giambisyon sa Sugbuanong long distance runner nga si Mary Joy Tabal mao ang pag-angkon og luna sa 2016 Summer Olympics didto sa Rio de Janiero, Brazil.

Segun sa taho ni Matthew Scott sa South China Morning Post, si Tabal mibutyag nga ang utlanan sa tanan niyang damgo mao ang mamahimo nga labing unang Pinay nga makasalmot sa Olympic marathon event.

“Hopefully, I can do good,” matud pa sa 26-anyos nga si Tabal. “I actually prefer the marathon and to represent the Philippines at the Olympics would be a dream come true for me. I am feeling strong but I just have to improve my endurance.”

Si Tabal nanghawod didto sa Hong Kong sa oras nga 1:21.41. Nagsunod niya mao si You Ya-jyun sa Taiwan  (1:22.46) ug Shiho Asada sa Japan (1:24.27).

Sunod nga sagubangon ni Tabal mao ang Boston Marathon karong Abril diin siya naglaraw nga makuha ang Olympic qualifying time alang sa marathon nga duha ka oras og 45 minutos. (BANAT NEWS)