CEBU, Philippines – Ang mga mamistahay sa Sinulog makahigayon pagsaksi og laing aksiyon gumikan kay ang tulo ka sumusulbong nga bitoon sa ALA Stable nga sila si ‘Prince’ Albert Pagara, Mark ‘Magnifico’ Magsayo ug Kevin Jake Cataraja mopahigayon og public workout sugod karong alas-6 sa gabii diha sa Gaisano Countrymall carpark sa Barangay Banilad, dakbayan sa Sugbo.
Ang 21-anyos nga si Pagara makigsinukliay og kumo ni Arjan Canillas, si Magsayo makigbatok ni Elmo ‘Bisdak’ Traya, samtang si Cataraja makigsinukmagay ni Christian Bacolod sud sa duha ka hugna nga sparring session nga seguradong ikalingaw sa mga manan-away.
Ang maong event kabahin sa hugtanon nilang preparasyon gumikan kay mosalida man sila sa ika-35 nga edisyon sa malampusong Pinoy Pride series nga ulohan og “Stars of the Future” karong Pebrero 27 diha sa Waterfront-Cebu City Hotel and Casino sa Barangay Lahug.
Ang wa’y pildeng super bantamweight prospect nga si Pagara (25-0, 18KOs) gikatakda untang makigtakus ni kanhi world champion Carlos Sanchez Jr., apan ang ALA Promotions napugos pagpangita og ihulip ni Sanchez kay duna man kini problema sa iyang kontrata uban sa iyang mga handlers.
Sa miagi niyang away, si Pagara milangkat sa WBO Youth 122-pound crown human gipakamang sa ikaunom nga hugna si Nicaraguan William Gonzales atol sa makasaysayanong Pinoy Pride event didto sa Amerika niadtong Oktubre 17 didto sa StubHub Center sa Carson, California.
Si Magsayo (12-0, 10KOs) gikatakda nga makigpinaksitay sa Mehikanong si Eduardo Montoya, samtang si Cataraja, kanhi amateur standout nga nagpakitang gilas karon isip pro, makig-atbang batok sa wala pa hisayring kontra.
Sama ni Pagara, impresibo sab si Magsayo sa iyang US debut diin iyang gipatikangkang ang kanhi wa’y pildeng Mehikano nga si Yardley Suarez aron pagsakmit sa IBF Youth featherweight title. (BANAT NEWS)