CEBU, Philippines – Dul-an sa usa ka gatos ka mga mananagat sa nagkadaiyang dapit sa Sugbo ang magtigi sa ilang abilidad sa pagbugsay og baroto gumikan kay ang ‘Sinulog 2016 Balik Baroto Regatta’ mosikad na karong adlawa.
Ang lumba pagasugdan human sa fluvial procession sa milagrosong Señor Sto. Niño sa alas- 9 sa buntag diha sa lapyahan sa Baywalk duol sa Cebu City Senior Citizen’s Park.
Ang mga partisipante, nga nagagikan sa Borbon, Argao, Tuburan ug dakbayan sa Talisay, maglawig sud sa unom ka milya sa kadagatan sa may South Road Properties.
Kapin sa P200,000 nga ganti ang gitagana alang sa mga mananaog sa karera nga gipasiugdahan sa Balik Baroto Movement ni kanhi Customs District collector David ‘Kuya Boy’ S. Odilao, Jr. inabagan sa Bisdak Group (Hugpong sa mga Bisaya alang sa Kauswagan ug Kaangayan, Inc.), kagamhanan sa dakbayan sa Sugbo, Sinulog Foundation ug Cebu Holdings, Inc. Gisuportahan sab kini nilang Mayor Democrito ‘Aljun’ Diamante, Jr. sa Tuburan, ang presidente sa League of Municipalities in the Philippines-Cebu Chapter, Butch Sepulveda sa Borbon ug Edsel Galeos sa Argao.