CEBU, Philippines – Ang pambato sa Sugbo nga si Marc Norman Enriquez mimakmak ni Calvin Chung sa Manila aron mouban ni seeded No. 2 Francis Casey ‘Nino’ Alcantara ngadto sa quarterfinal round sa Peugeot Philippine Tennis Open-Cebu leg kagahapon didto sa Cebu Country Club.
Si Enriquez, varsity player sa University of the Visayas (UV), grabe kaayong nakapakita sa iyang abilidad hinungdan nga gisirohan niini si Chung sud sa duha ka sets, 6-0, 6-0.
Nakaangkon sab og luna sa sunod nga hugna si Alcantara human iyang gitagak ang Sugbuanong si Franklin Encarnacion, 6-0, 6-1 sud lamang sa 30 minutos.
Gawas ni Enriquez, lain pang tulo ka mga Sugbuanon nga sila si RJ Abarquez, Dan Eldred Cinco ug Jan Godfrey Seno ang miabante sab uban nilang Ryan Christian Quilicot sa Bohol ug Marcen Angelo Gonzales ug Claudio Canlas sa Manila. Si Abarquez mipalagpot ni Venz Alforque, 6-3, 6-3, si Cinco mitagak ni Janel Pintor, 6-2, 6-2, samtang si Seno miposte og 6-3, 6-3 nga daog batok sa karibal niyang Zamboangeño nga si Jose Maria Pague.
Sa women’s division, ang Sugbuanong si Jana Marie Pages miabli sa iyang kampanya pinaagi sa pagposte og impresibong 6-1, 6-1 nga kadaugan batok ni Annika Mallari sa Manila.
Wala hinuo’y suwerte si Kristin Renee Salimbangon gumikan kay gipilde siya sa bisitang si Kendies Thea Malinis, 2-6, 3-6. (BANAT NEWS)