Heat mipakaging sa Mavs
CEBU, Philippines – Si Hassan Whiteside mirehistro og 25 puntos uban ang 19 ka rebounds aron pangulohan ang Miami Heat, kinsa niduwa nga wala si Dwyane Wade sa starting line-up atol sa ilang 106-82 nga kadaugan batok sa Dallas Mavericks kagahapon didto sa American Airlines Arena sa Miami, Florida.
Si Wade miduwa gikan sa bench sa ika-10 nga higayon sa iyang career tungod sa hilanat ug nalipong human sa injection. Miiskor lang siya 10 puntos ug may pito ka assists sud sa 19 minutos.
Natabla ni Whiteside ang iyang career high sa puntos ug mihimo’g season high sa rebounds alang sa Heat, kinsa aduna na karo’y 19-13 nga baraha human maputol ang ilang two-game losing skid.
Katapusang higayon nga gihimo si Wade isip reserve sa usa ka NBA game niadto pang Enero 2014 batok sa San Antonio Spurs.
Ang guard nga si Tyler Johnson maoy mipuli ni Wade isip starter. Kini ang una karon nga season ug ikatulong higayon sa batan-ong career ni Johnson.
Si Dirk Nowitzki napugngan lang ngadto sa 11 puntos diin nakahimo lang siya’g 4-of-14 sa iyang shooting alang sa Mavericks, kinsa wala gyud makalabaw. Ang guard sa Mavericks nga si Jose Juan Barea, kinsa nag-average og 22.3 puntos sa miaging upat ka duwa, igo lang mihimo’g sayes puntos sa iyang pagbalik sa Miami nga maoy iyang hometown.
Wala sab mag-igo ang Mavericks sa first period hinungdan nga gibiyaan sila sa Heat, 22-10 human sa maong kuwarter.
Si Wade misulod sa duwa sa 7:45 ang nahibilin nga oras sa second quarter diin labaw ang Heat, 36-22.
Nainat sa Miami ang labaw, 58-45 atol sa halftime. Si Wade nakahimo’g walo ka assists sud lang sa walo ka minutos ug may 66.7 percent field shooting sa second quarter, samtang si Whiteside adunay 18 puntos ug may 13 ka rebounds sa halftime.
Human sa tulo ka kuwarter, ang Heat miinat sa ilang labaw ngadto sa 80-61 luyo sa ilang 57.9 percent field shooting.
Sa laing mga duwa, ang Toronto Raptors midaog batok sa Charlotte Hornets, 104-94.
Si DeMar DeRozan maoy nangu sa kadaugan sa iyang 23 puntos, gisundan ni Kyle Lowry nga adunay 18 puntos. Si Kemba Walkers mao sab ang nangu sa Hornets sa iyang 18 puntos
Midaog sab ang Chicago Bulls pinaagi sa paglubong sa New York Knicks, 108-81, samtang gilubong sab sa Washington Wizards ang Orlando Magic, 103-91. (BANAT NEWS)
- Latest
