CEBU, Philippines – Himuon na karong alas-7 sa gabii ang tinuig nga election sa Cacoy Doce Pares diha sa ilang headquarters sa dalan C. Padilla, dakbayan sa Sugbo.
Gumikan kay si Supreme Grand Master Ciriaco ‘Cacoy’ Cañete, 96-anyos gitudlo na man nga president-for-life sa Doce Pares, ang pilion na lang sa grupo mao ang posisyon gikan sa bise presidente ngadto na sa board of directors.
Gawas sa mga suod nga higala ni SGM Cacoy, motambong usab ang mga sakop sa Doce Pares, kinsa mohimo og nagkalain-laing demonstrasyon sa ilang nahibaw-an nga abilidad sa Doce Pares. Lakip sa mopasundayag mao ang apo ni SGM Cacoy nga si Grandmaster Chuck Cañete, anak nga babaye nga si Bernadette Cañete-Tormis, lain apo nga si Mico Cañete ug Grand Master John Mac.
Duna sa’y pipila ka mga langyaw nga estudyante ni SGM Cacoy ang motambong sa tinuig nga election. Unya sa unang semana sa Enero, himuon ang ika-84 nga anibersaryo sa Doce Pares ug manumpa sab ang mga bag-ong napiling opisyales. (BANAT NEWS)