Westbrook, Durant nagmangtas

CEBU, Philippines – Diriyot makahimo og  triple-double  si Russell Westbrook sa 122-112 nga kadaugan sa Oklahoma City Thunder batok sa Denver Nuggets sa duwa nila sa  NBA kagahapon didto sa  Chesapeake Arena sa Oklahoma City.

Si Westbrook mihimo’g 30 puntos uban  ang 12  ka assists ug siyam ka rebounds aron pangulohan ang opensa sa  Thunder, kinsa mi-rally gikan sa ilang 11 puntos nga biya sa second-half.

Hinuon, si Kevin Durant mitala sa iyang  ikawalo nga double-double karon nga season  human   miposa og 26 puntos  uban ang 10 ka assists  alang sa Thunder  nga midaog na og 10 sa miaging 12 nila ka duwa. Bag-o lang sab silang naggikan sa pilde batok sa Chicago Bulls atol sa  Christmas Day.

Ang Thunder nakahimo kagahapon og season-best 57.8 percent field shooting. Nabiyaan sila sa nahabiling  8:13  sa fourth quarter sa wala pa nila  makontrolar ang duwa pinaagi sa ilang 11-2 run nga naglakip sa siyete puntos ni Enes Kanter, kinsa miamot og 21 puntos alang sa Thunder.

Ang 6-0 spurt gikan ni Dion Waters nga uban ang steal ug dunk maoy naghatag sa Thunder og 117-108 nga labaw sa nahabiling 2:07 sa duwa.

Si Kenneth Faried maoy nangu sa Nuggets sa iyang 25 puntos. Ang Denver napilde na og unom ka sagunson nga duwa didto sa  Oklahoma City.

Wala kaayo mag-igo ang Thunder pagsugod sa duwa diin biya sila sa 2-8. Ang Oklahoma nakalabaw sa first half, apan dili kaayo ka daku sa first half. Gitapos  sa Denver ang first half sa ilang 13-7 run aron molabaw, 61-51 sa wala pa kini mahimong otso puntos nga biya   human sa lay-up ni Westbrook atol sa paghuni sa buzzer.

Ang three-pointer ni Kostas Papanikolaou maoy naghatag sa Denver og 11 puntos nga labaw pagsugod sa third period, apan nagkumboya silang Westbrook ug Durant sa ilang 20-9 run aron tablahon ang duwa sa 73-all  sa nahabiling 5:07   oras sa maong kuwarter.

Ang assists ni Durant ngadto ni rookie   Cameron Payne alang sa usa ka 3-pointer  maoy naghatag sa Thunder og 91-90  nga labaw pagsugod na sa  fourth quarter.

Nakalabaw ang Nuggets sa katapusang higayon sa iskor nga 97-96 sa basket ni Randy Foye sa 8:13 ang nahabiling  oras sa duwa. Apan mibawos si Kanter pinaagi sa follow-up human mosipyat sa iyang jumpshot si Serge Ibaka.  Mi-dunk sab si Kanter gikan sa assist ni Westbrook nga maoy naghatag sa Thunder sa labing daku nilang labaw nga kuwatro puntos,101-97.

Ang nagsunod nga dunks nilang Westbrook ug Ibaka, kinsa midugang og 19 puntos, maoy naghatag sa Thunder og espasyo ug kaluag sa ilang dughan human molabaw, 107-99 sa nahabiling 5:09 sa duwa.

Si Will Barton mihimo sab og 19 puntos alang sa Denver, samtang  si Joffrey Lauvergne adunay 18 puntos.

Sa laing mga duwa,  ang Memphis Grizzlies midaog batok sa Los Angeles Lakers, 112-96, midaog sab ang Boston Celtics batok sa New York Knicks, 100-91 ug  ang Portland TrailBlazers  mipukan sa Sacramento Kings, 98-94. (BANAT NEWS)