CEBU, Philippines – Gatosan ka mga siklista ang gilaumang mosalmot sa ‘share a road’ campaign sa kagamhanan sa dakbayan sa Sugbo nga giulohan og “Sikad Sugbu” karong adlawa nga manukad sa Lantaw sa South Road Properties (SRP) paingon ngadto sa Uling, Naga.
Ang mga seklista mosubay sa rota nga adunay gilay-ong 52 kilometros, apan dili kini kompetisyon ang maong event tungod kay laraw lang niini mao ang pagkuha sa atensiyon sa publiko sa umaabot nga city ordinance kabahin sa pagbutang og bike lanes sa siyudad.
Giplanohang butangan og bike lanes mao ang dalan paingon sa Busay, Banawa ug F. Llamas ngadto sa Katipunan sa Barangay Labangon.
Sa press conference kagahapon, si Cebu City councilor Gerry Carillo miingon nga nagplano usab sila nga mohimo og bike for tourism campaign. Magbutang usab sila og mga bike loops diha sa SRP, Buhisan ngadto sa Guadalupe ug Guadalupe to Kalunasan.
Sila si Niño Abarquez ug Voltaire Montebon mga sakop sa ThreeOfMe midugang ang maong event gilauman nga mopalig-on sa panaghigalaay sa mga local cyclists ug triathletes.
Mapasalamaton ang mga organizers kay nakakuha sila og positibong tubag sa mga triathletes, cyclists ug runners.
Ang mga grupo nga mipakita og suporta naglakip sa Infinitea Group, Iga ug HARD Multisport, Kumbati of Naga ug Sugbu Bikers’ Club ni Boy Rabasol. (BANAT NEWS)