CEBU, Philippines - Human wala makaayag sa iyang abilidad sa duathlon ug triahlon gumikan kay naaksidente, si Aaliyah Ricci Mataragnon sa Team Cebu City mibuhos sa iyang talento sa cycling event diin siya mikabkab og duha ka gold ug usa ka silver medals sa 2015 Philippine National Games-Batang Pinoy Championships didto sa dakbayan sa Danao.
Giangkon ni Mataragnon ang ikaduha niyang bulawan sa 37-kilometer road race diin siya maoy labing paspas sa oras nga usa ka oras ug usa ka minuto. Laing pambato sa TCC nga si Catherine Yu naka-silver sa 11-13 age group, samtang si Nicole Del Rosario mibira og bronze.
Sa iyang bahin, si Yuan Chiongbian nakadaog og silver sa boys 14-15 class nga gidominar ni John Bucat sa Pangasinan.
Didto sa Mandaue City, ang TCC mitak-op sa ilang kampanya pinaagi sa paghakot og upat ka golds gikan nilang 50 kgs. Marjun Agad, 56 kgs. Dexter John Tabique, 40 kgs. Leonida Cambarijan, ug Princess Gale Tirol. Ila kining gidungagan og tulo ka silvers ug duha ka bronzes.
Sa Cebu City Sports Center, gipamatud-an ni Samantha Limos sa TCC nga siya gyud maoy labing paspas nga babayeng runner sa maong usa ka semanang torneyo human gilabni ang ikaduha niyang gold sa 200m run sud sa oras nga 25.99 segundos.
Si Aldemar Navarro sa Cebu Province naka-gold sab sa javelin throw sa distansiya nga 44.76 metros.
Sa Gaisano Capital-South, ang Cebu Province maoy naghari sa karatedo bitbit ang unom ka gold, upat ka silver ug 15 ka bronze, samtang ikaduha ang Cebu City nga dunay tagutlo ka gold ug silver uban ang 13 ka bronze.
Naka-gold sa Cebu Province mao sila si Precious Belecario, Melquisedec Dela Victoria, Greg Christian Cabrera, 2Janine Narbuada, ug Allison Kyle Quiroga, samtang nakamina og bulawan sa TCC mao sila si Joseph Casquejo, Marie Pauleen Cabrera ug Jerson Sanchez. (BANAT NEWS)