CEBU, Philippines - Mibahad si one-time world title challenger ‘King’ Arthur Villanueva (2701, 14KOs) ug si Mexican Victor ‘Spock’ Mendez (19-2, 15KOs) nga mohimo’g knockout nga kadaugan atol sa ilang sangka alang sa WBC International super flyweight title sa main event sa “Pinoy Pride 34: Back with a Vengeance” fight card karong Sabado sa gabii didto sa Hoops Dome sa Barangay Gun-ob, Lapu-Lapu City.
Mikompisal si Villanueva mibati siya og gamay’ng presyur kay siya ang moaway sa main event, apan daku gihapon siya og kompiyansa nga molangkat sa bakus batok sa Mexican knockout artist.
“Na-shock sab ko kay ako na’y moaway sa main event, pero ready na gyud ko ug andam na ko sa away,” matud pa sa garbo sa Bacolod City.
Si Villanueva nakakita na sa tapes sa mga away sa iyang kontra ug iyang pangandaman ang usa ka kulbahinam ug lisud nga sangka batok sa Mehikano. “Kita nami sa iyang tapes ug nindot ni nga kontra kay di modagan ug ganahan makigsinukmagay. Dili gyud ni abtan og 12 rounds,” dugang pa niya.
Gitubag hinuon siya ni Mendez, kinsa kompiyansa kaayo nga makuha ang bakus ug madala kini ngadto sa Mexico.
“If he says that there will be a knockout, then I am also ready for a knockout win. I already have a vision of carrying that belt back to Mexico.”
Sa laing bahin, ang stablemate ni Villanueva nga si Milan ‘El Metodico’ Melindo (32-2, 12KOs) pabilin nga gutom og daog sa iyang pakigharong ni Victor Olivo (9-0, 4KOs).
Kini bisan pa og usa ka last minute replacement iyang sangkaon human ang orihinal niyang kontra nga si Carlos Fontes wala midayon human masakit og dengue.
“Lisud gihapon ning awaya kay mag-adjust ko niya (Olivo). Right handed siya nya akong gi-triningan para sa walhon ug mubo usab ni siya unya ako gika-spar mga taas man kay taas man to si Fontes,” matud pa ni Melindo.
Sa undercards, si Kevin Jake ‘KJ’ Cataraja makigharong ni Indonesian Faris Nenggo (10-8, 3KOs), samtang si AJ ‘Bazooka’ Banal makigbinukbukay ni Tanzanian Emilio Norfat (24-6, 18KOs) ug si Rocky ‘Road Warrior’ Fuentes (35-8, 20KOs) moharong ni Afrizal Tamboresi (11-3, 6KOs). (BANAT PALARO)