CEBU, Philippines - Gawas sa pag-host sa national finals sa Philippine National Youth Games kon Batang Pinoy, ang mga Sugbuanon naglaraw sab nga mokulit og laing Guinness world record, ning higayona alang sa labing daku nga presentasyon sa arnis.
Tinguha nga marehistro sa Sugbo ang maong rekord karong Disyembre 2, human sa seremonyas
sa pagsira sa Batang Pinoy diha sa Cebu City Sports Center.
Ang arnis gideklara nga maoy nasudnong paugnat sa kusog sa nasud pinasikad sa Akta
Republika 6850 pipila pa ka tuig ang milabay.
Gawas niini, ang arnis usa na sab sa mga regular sports nga kumbatihan sa tinuig nga Palarong
Pambansa.
Gumikan kay pipila ra ka mga Sugbuanon ang misidlak sa arnis matag Palaro, ang Cebu City Sports
Commission naaghat paghulma og programa alang sa arnis ug dili lamang aron makamugna og world record.
Atol sa aktuwal nilang presentasyon, ang mga organizers sa maong record attempt nagtinguha
nga makahakot og 7,000 ka mga partisipante sagad mga estudyante sa Abellana National School (ANS).
Kahinumduman, ang ANS daku sab og natabang sa pagkulit sa Sugbo og world record sa labing
daku nga dance class ug ingon man labing daku nga chess tournament.
Basihan nila sa ilang presentasyon ang lagda nga gisubay sa Department of Education (DepEd)
matag Palarong Pambansa aron wa’y problema kabahin sa estilo nga gamiton kay duna man sa’y lain pang
mga kahugpongan sa arnis dinhi sa nasud. (BANAT NEWS)