Cebu andam na sa Batang Pinoy nationals

CEBU, Philippines - Andam na ang tanan alang sa pagpahigayon sa Philippine National Youth Games-Batang Pinoy National Championships nga mosikad karong Nobiyembre 27 diha sa Cebu City Sports Center.

Ang mga delegado sa maong usa ka semana nga kalandrakas sa paugnat sa kusog nga gipaluyohan sab sa probinsiya sa Sugbo ug dakbayan sa Mandaue ug Danao magsugod og pangabot karong petsa 24.

Sa dili pa ang kompetisyon, dunay pagahimuon nga refresher’s course alang sa tanang mga officiating officials karong Nobiyembre 25-26.

Ang mga events nga kumbatihan sa CCSC mao ang athletics, swimming, rugby ug sepak takraw.

    Duwaon ang badminton sa MetroSports sa Lahug, ang beach volley sa Fort San Pedro, ang boxing ug cheerleading sa Cebu Coliseum ug ang chess sa DepEd-Cebu City division office.

    Banatan ang futsal sa Don Bosco Technology Center, handball sa Cebu City Sports Institute, karatedo sa Gaisano Capital-South, samtang ang soft ug regular tennis adto sa CitiGreen ug Alta Vista Golf and Country Club.

    Ang volleyball adto ipahigayon sa Sacred Heart gym, wushu sa Cebu Eastern College ug ang table tennis ug dancesport sa Cebu Capitol social hall.

Ang Mandaue maoy mo-host sa arnis ug weightlifting didto sa ilang sports complex ug ingon man sa wrestling ug pencak silat didto sa  Barangay Ibabao gym.

Samtang ang Danao gitahasan pagpadagan sa triathlon didto sa Boardwalk, cycling sa Manlayag, softball sa Ramon Durano Sr. Sports Complex ug 3-on-3 basketball sa Danao City Sports and Civic Center. (BANAT NEWS)