Cebu province nidominar sa karatedo event sa sa Philippine National Games
CEBU, Philippines – Giladlad sa mga karatekas gikan sa Cebu Province ang tanan nilang abilidad aron modominar sa karatedo event sa Philippine National Games-Visayas leg kagahapon didto sa Antique.
Ang Cebu Province mihakot og 19 ka gold, 11 ka silver ug 12 ka bronze medals, nagsunod ang Team Cebu City nga mikolekta og 5-3-3 gold-silver-bronze medal tally.
Upat ka mga gold medals sa Cebu Province nagagikan sa team event, samtang pito nila ka mga pambato ang mihatag og individual gold nga naglakip nila ni Gerald Agustin Baclaan, DJ Mae Dente, Joan Inigo, Steffi May Tabanag ug Gwen Jade Ponteros.
Sa ilang bahin, sila si Avelino Suan ug Anjilo Sadili maoy miangkon sa una ug ikaduha nga dapit sa 30-above class kumite alang sa Team Cebu City.
Si Joshua Famador mitunol og gold ug silver, samtang sila si Reynante Dumao, Kent Juban, Jesah Mae Bacus mitampo usab og gold matag usa. Sila si Fausto Vallar ug Sherwin Maraviles maoy mga silver medalists ug Kelvin Suan ug Keisha Ruth Labiaga misakmit og bronzes. (BANAT NEWS)
- Latest
