CEBU, Philippines – Didto mismo sa ilang tugkaran sa Oracles Arena, nakasinati si Stephen Curry sa iyang labing bati nga ‘shooting’ diin igo lang siyang mihimo’g 22 puntos atol sa kadaugan sa Golden State Warriors batok sa Detroit Pistons, 109-95 sa nagpadayong duwa sa National Basketball Association.
Misipyat si Curry sa una niyang pito ka tirada ug mitapos sa duwa nga adunay 7-of-18 field goal shooting. Kini ang ikatulong higayon karon nga season nga napugngan si Curry ngadto sa ubos 30 puntos.
Si Curry, ang reigning MVP, mihimo sab og lima ka assists ug lima ka rebounds alang sa defending champion nga mao na lang ang bugtong team nga wala pa makatilaw og pilde human sa walo ka duwa.
Si Klay Thompson maoy nangu sa Warriors sa iyang 24 puntos, samtang si Andre Iguodala midugang og 13 puntos. Sila si Harrison Barnes ug Leandro Barbosa mitampo’g 12 ug 10 puntos matag usa.
Ang kasamtangang 8-0 start sa Warriors maoy ikaduhang labing maayo sa ilang franchise history.
Si Reggie Jackson nga gikan pa sa iyang career-high nga 40 puntos sa miaging adlaw didto sa Portland, maoy nangu sa 5-2 nga Pistons sa iyang 20 puntos, gisundan ni Andre Drummond nga adunay 14 puntos ug 15 ka rebounds. Ang Warriors naglabaw og labing menos 17 puntos, apan naglisud lang gihapon sila batok sa Pistons ug didto lang sila nakaginhawa og lawom human sa ilang 10-0 run sa fourth quarter.
Miabot og 20 puntos ang labaw sa Warriors, 102-82 human sa three-pointer ni Curry.
Ang Pistons napilde na og siyam ka higayon ngadto sa Warriors gikan pa sa tuig 2010 ug wala sila modaog didto sa Oracle Arena sukad niadtong Nobiyembre 13, 2008.
Ang Warriors aduna na’y 23 ka sagunson nga daog didto sa ilang korte.
Sila Thompson ug Curry maoy mga players sa kasaysayan sa ilang franchise nga naghupot og 800 career 3-pointers.
Sa laing mga duwa, ang Los Angeles Clippers nakaipsot batok sa Memphis Grizzlies, 92-90, ang Indiana Pacers milubong sa Orlando Magic, 97-84, gilubong sab sa Chicago Bulls ang Philadelphia Sixers, 111-88.
Ang Minnesota Timberwolves mibuntog sa Atlanta Hawks, 117-107, ang Denver Nuggets mipukan sa Portland TrailBlazers, 108-104 ug ang San Antonio Spurs mipaluhod sa Sacramento Kings, 106-88. (BANAT NEWS)