CEBU, Philippines – Si kanhi world champion Johnreil 'Cuadro Alas' Casimero gikatakda nga mohagit ni McJoe Arroyo sa Puerto Rico alang sa IBF super flyweight title karong Disyembre 18 sa wala pa matino nga binyu didto sa Las Vegas.
Mao kini ang gipabuhagay nga balita ni US promoter Sampson Lewkowicz atol sa pakighimamat niini sa mga sakop sa Cebu sports media niadtong Sabado sa hapon didto sa La Gondola Italian restaurant anaa mahimutang sa Waterfront-Cebu City Hotel and Casino.
Matud pa ni Lewkowicz nga komportable kaayo si Casimero sa timbang nga iyang awayan karon ug hugtanon kaayo ang gihimo niining pagbansay-bansay alang sa umaabot niyang tahas bitbit ang tinguha nga ma-world champion og balik.
"He's going to a champion again. No doubt about that," tubag pa ni Lewkowicz sa dihang gipangutana kun unsay tsansa ni Casimero nga walay pilde ang Puerto Rican nga kampiyon.
Si Casimero, ang kanhi IBF flyweight champion, nagbitbit og record nga 21 ka daog, 13 niini piaagi sa knockout, uban ang tulo pa lamang ka pilde. Samtang si Arroyo nagtangag og way tatsang baraha nga 17-0 uban ang 8KOs.
Mao kini ang ikatulong higayon nga si Arroyo makigharong batok sa usa ka Pinoy nga kontra. Iyang gilangkat ang bakanting IBF flyweight title human gipukan si Arthur Villanueva sa ALA Boxing Gym niadtong Hulyo 18. Niadtong Disyembre 20 sa miaging tuig, iyang gipakgang si Mark Anthony Geraldo sa ilang IBF title eliminator. (BANAT NEWS)