CEBU, Philippines – Si Golden Boy Promotions Vice President Eric Gomez nagkanayon nga naglaum gihapon sila nga maka-away sa ilang boksingerong si Lucas Mathysse si Pinoy ring superstar Manny Pacquiao sa umaabot.
Matud pa ni Gomez nga mao unta kini ang plano nilang mahitabo sunod tuig, apan nahugno ang tanan human si Mathysse gipalukapa ni Viktor Apostol sa ika-10 nga hugna sa ilang WBC junior welterweight title fight sayo ning bulana didto sa StubHub Center sa Carson, California.
Apan bisan pa man sa wala damha nga hitabo, si Gomez mipadayag nga ila gihapong gitinguha ang maong sangka bisan tuod mikunhod na ang interes sa duha ka kampo kalabot niini.
"A fight between Mathysse and Pacquiao is a permanent goal for our company, but it is still premature to talk about something like that , after the loss Lucas had against Viktor Apostol," dason pa ni Gomez sa dihang nahinabi ni Elisinio Castillo sa boxingscene.com.
"Nothing has been discarded regarding those plans and our desire is still to have Lucas get in the ring with Pacquiao in the future. But we're going to have to wait," dugang pa ni Gomez.
Si Pacquiao, ang bugtong eight-division world champion sa kasaysayan sa boksing, gikatakda nga mo-away sa katapusang higayon karong Abril 9 didto sa Las Vegas. Apil sa mga gipilian aron iyang makontra mao sila sila si Terrence Crawford, Juan Manuel Marquez, Amir Khan ug Tim Bradley.
Si Pacquiao misaad nang daan nga hingpit na siyang mobiya sa boksing kun ugaling buligan sa maayong palad nga modaog siya pagka-Senador sa Pilipinas sa bugnong lugaynon unya sa Mayo 2016. (BANAT NEWS)