Thunder nakaipsot sa Magic

CEBU, Philippines – Dili lang usa, kun dili duha ka overtime ang gikinahanglan sa Oklahoma City Thunder   sa wala pa nila maangkon ang kutas nga kadaugan batok sa Orlando Magic, 139-136 sa nagpadayong duwa sa NBA kagahapon didto sa Amway Arena sa Orlando, Florida.

Si Russel Westbrook mipasud sa iyang 3-pointer ubos lang gamay sa midcourt aron tablahon ang duwa  human sa regulasyon alang sa iyang 48 puntos, samtang si Kevin Durant   midugang og 43 puntos  aron makaipsot ang Thunder sa  double overtime.

Gawas sa puntos, si Westbrook mihimo sab og 11 ka rebounds ug walo ka assists, samtang si Durant milangkat og 12 ka rebounds.

Ang Thunder nabiyaan og labing menos 18 puntos, apan mihimo  sila’g 42-24 scoring run batok sa Magic sa fourth quarter. Si Westbrook mihipos og 14 puntos sa extra periods.

Si Tobias Harris maoy nangu sa Magic sa iyang  30 puntos, samtang si Nik Vucevic midugang og 26 puntos ug si Victor  Oladipo adunay 21 puntos, 13 ka rebounds ug 10 ka assists nga maoy unang player nga nakahimo  og triple-double karon nga season. Ang iyang  3-pointer  maoy nakapugos sa ikaduhang overtime.  

Ang Magic wala makapiog sa Thunder didto sa second half tungod kay human sila mohimo’g franchise-record nga 79 puntos sa first half, igo lang silang nakahimo'g 67 puntos didto sa second half. 

Ang Thunder aduna na’y 2-0 nga baraha ug tinguha nilang makasagunson og tulo sa dihang mo-host sila sa Denver Nuggets ugma.

Sa lain mga aksiyon, ang Detroit Pistons nagbitbit na og 3-0 nga baraha human midaog batok sa Chicago Bulls, 98-94, midaog sab ang Toronto Raptors batok sa Boston Celtics, 113-103.

Si Marcus Morris maoy nangu sa Pistons sa iyang 26 puntos, gisundan ni Andre Drummond  nga midugang og 20 puntos.

Sila si Jimmy Butler ug Pau Gasol maoy nangu sa Bulls sa ilang 23 ug 12 puntos matag usa.

Ang Washington Wizards aduna na’y 2-0 nga baraha  human sila modaog batok sa Milwaukee Bucks, 118-113, ang Minnesota Timberwolves milubong  sa Denver Nuggets, 95-78. 

Midaog sab ang   Sacramento  Kings batok sa Los Angeles Lakers, 132-114, ang Cleveland Cavaliers mipukan sa Miami Heat, 102-92,  gilubong sab sa  Utah Jazz ang Philadelphia Sixers, 99-71. Ang Atlanta Hawks nakaipsot batok sa Charlotte Hornets, 97-94,  gibanatan sab sa  San Antonio Spurs ang Brooklyn Nets, 102-75 ug  ang Phoenix Suns batok sa Portland Trailblazers, 110-92. (BANAT NEWS)