CEBU, Philippines - Mirehistro sa ikaduhang sunod-sunod nga daog ang Iesieken ug ang Allied batok sa tagsa-tagsa nilang karibal aron magsawo sa liderato sa Triple-A Christmas League 2015 basketball tournament niadtong Domingo didto sa Kimwa gym sa Barangay Subangdaku, Mandaue City.
Sa kasamtangan, ang Iesieken ug Allied parehong nagbitbit og 2-0 nga baraha.
Ang Iesieken ni playing coach Dandy Tagalog midaog batok sa Triple-A sa iskor nga 61-57, samtang ang Allied nakaipsot sa sikit kaayo nga duwa batok sa Gallego, 54-53.
Grabe kaayong nakaduwa si Mai Suson diin mikadlit kini og 20 puntos alang sa Iesieken nga nakabangon human gilubong og 14 puntos, 7-21 sa nahabiling 1:10 sa first quarter aron mokulit og daog.
Miabag sab sa opensa si Roberto Cuerbo ug Orly Navarro nga mitampo’g 12 ug 10 puntos matag usa.
Bugtong si Geryl Bukiron lang ang mikulit og double digits alang sa Allied nga adunay 23 puntos, lakip ang lima ka triples.
Sa laing bahin, si Triple-A president Gilbert Lesin miburak og 12 puntos aron mangu sa Allied. Sila
si Barak Recto ug Merot Ygoña miambit og 10 puntos matag usa alang sa Allied nga wala na magdahom nga modaog pa.
Ang nadisgrasya nga Gallego gipangulohan ni Nets Flores, kinsa mikamada’g 14 puntos, gisundan ni Rey Gonzaga nga adunay 12 puntos.
Sa pasiunang duwa, giyayongan nilang Redyn Villaronza ug Francis Palero ang kadaugan sa Limasawa human sila nagkumboya og 42 puntos.
Ang playing coach nga si Villaronza mipabuto og 22 puntos, samtang si Palero mikadlit og 20 puntos alang sa Limasawa nga aduna na’y 1-1 win-loss record.
Nagbanos-banos og labaw ang duha ka kampo, sa unang tulo ka kuwarter, ug didto na miarangkada ang Limasawa sa fourth quarter sa pagpangulo nilang Villaronza ug Palero nga grabe sab kaayo og depensa.
Ang Gilas D’ Boys gipangulohan ni Rex Gonzaga, kinsa mitusak og 24 puntos, gisundan ni Estremos sa iyang 13 puntos. (BANAT PALARO)