CEBU, Philippines – Ang Cebu Executives and Professionals Chess Association pormal nga mi-saulog sa ika-25 niini nga anibersaryo niadtong Sabado sa gabii didto sa Social Hall sa Sacred Heart Center.
Gawas nga gipasidunggan ang pipila ka mahinungdanong personalidad nga naka-ambag sa paglambo sa CEPCA sa naglabay'ng mga katuigan, gilab-as sab sa mga sakop sa maong kahugpungan ang maanindot nga kaagi ug ingon man gihinumduman ang mga butang nga ilang natampo sa komunidad sa paugnat sa kusog dinhi sa Sugbu.
Apil sa mga mitambong sa maong memorableng kalihukan samtang gitimaan ang mabulokon nilang kagahapon mao ang founding members sa CEPCA nga sila si Frank 'Boy' Pestaño ug Alex Tolentino ug ingon man ang mga kasamtangang opisyales niini nga gipangulohan sa maabtik nilang presidente nga si Engr. Jerry Maratas.
Natukod niadtong tuig 1990, siyam ra ka buok ang orihinal nga sakop sa CEPCA apan miburot na kini ngadto sa gatusan ka mga miyembro gikan sa nagkadaiyang propesyon sa milabay nga duha ug tunga ka dekada.
‘Now, 25 years since its birth, I’m proud to say that CEPCA is still very much alive and continue to remain relevant in Cebu chess,” matud pa ni Maratas. “I would like to make a special mention to Mr. Boy Pestaño, the untiring heart and soul of CEPCA. He deserves the credit of bringing CEPCA to where it is now today.”
Gihatagan og posthumous awards mao sila si CEPCA founder Matias 'Bombi' Aznar III, Arturo Ynclino, Danny Ynclino ug Sonny Sollano. Gipasiduggan sab ang mga nangaging pangulo sa CEPCA nga naglangkob nilang Boy Pestano, Alex Tolentio, Nicnic Climaco, Manny Manzanares, Jun C. Olis, Mandy Baria, Norway Lara, Romualdo Muralla, Benjamin Dimaano, Roger Reyes, Victor Legaspina, Bobot Villaluna, ug Mat Matuco.
Gibayaw sab sa bantawan sila si chess patron Boojie Lim, Andrew Aznar, Kelly Uy ug Darcy Tabotabo ug ang Marie Ernestine School. Gitunolan sab og special award silang FIDE Arbiter Marvin Ruelan, Susan Itaas, Ely Bercilles, ug Handuraw Pizza.
Ubos sa liderato ni Maratas, ubay-ubay ang nahimo nga kaayuhan sa CEPCA aron pag-ugmad ug ingon man pag-umol sa talento sa mga batan-ong magduduwa og ahedres.
“In short, we have seen a more vibrant and dynamic club in the past two years,” batbat pa ni Maratas.“While CEPCA endeavors in holding quality tournaments, we are also serious in the promotion and development of chess up to the grassroots level here in Cebu.” (BANAT NEWS)