Liloan mo-host triathlon event

CEBU, Philippines - Ang lungsod  sa Liloan mo-host og triathlon event nga pagaulohan og ‘Tri Liloan’ sa Disyembre 20 didto sa Looc, Poblacion.

Si Liloan Mayor Duke Frasco mao mismo ang nangulo sa launching sa maong  kalihukan didto sa Politics sa Escario Central Mall.

Ang Liloan giisip nga usa sa mga lugar sa Sugbo nga sikat ang triathlon tungod usab kay naka-host na kini sa Xterra Philippines. Ning higayona ang mga local triathletes makahigayon sa pagbaid sa ilang abilidad sa maong swim-bike-run event.

Ang  lumba naglangkob og standard distance sa individual ug relay events.

Tungod kay mao pa lang kini ang pagsugod sa ilang lumba, 100 ka mga individual entries ug 20 sa relay lang ang gitugtan pagsalmot.

Ang lumba gibahin sa male ug female categories nga gibahin-bahin sa nagkadaiyang age-brackets.

Kapin sa P80,000  nga ganting salapi ang gitagana alang sa top finishers.

Ang registration sugdan sa Oktubre 26 hangtod  sa  Disyembre 11.

Ang registration fee nagkantidad og P3,000 sa individual event ug P6,000 matag team sa relay libre na ang finisher’s medal, shirt, post-race meal, race bib, helmet ug bike number.  Mahimong magparehistro didto sa The Brick sa Ebloc Tower 1 / JP Morgan Bldg., Cebu IT Park ug SATS office. (BANAT NEWS)