CEBU, Philippines – Miwadwad pag-ayo ang import sa University of San Carlos nga si Shooster Olago sa fourth quarter diin mihimo siya’g sagunsong 10 puntos aron baswaton ang Warriors, kinsa midaog batok sa University of the Visayas Green Lancers, 64-53 sa deciding match aron sakmiton ang titulo sa 15th Cebu Schools Athletic Foundation, Inc. (CESAFI) men’s basketball tournament kagabii didto sa Cebu Coliseum.
Mao kadto ang unang collegiate crown sa Warriors sukad niadtong 1958 ug ilang naputol ang 57 ka tuig nga huwaw sa korona.
Human sila mabiyai og 12 puntos, 8-12 sa sayong bahin sa second period diin wala makapugong ang Warriors kang Leonard Santillan, hinay-hinay nga mikamang sa unahan ang nauwahi ug ilang gitapos ang halftime, 25-30 nga biya.
Si Olago nakaiskor og sunod-sunod nga sayes puntos sa third period aron makasikit sa pagbalik, 40-46. Misikit pa sa dos puntos ang Warriors human sa basket ni Olago, 44-46 hangtod nga iyang napatabla sa labing unang higayon, 46-all.
Nahimong mabulokon ang unang paglabaw sa Warriors tungod sa one-handed monster slam ni Olago atubangan sa import sa Lancers nga si Cedrick Akomo, 48-46 sa nahabiling 7:40 sa fourth period.
Ang Warriors miiskor sa ilang kinadak-ang labaw sa iskor nga 61-49 sa katapusang 1:20 sa duwa.
Ang three-pointer ni Nico Magat maoy naghatag sa Warriors og 59-49.
Si Olago, kinsa maoy nangu sa Warriors sa iyang 26 puntos, maoy napiling MVP. Siya sab ang nangulo sa Mythical Five uban nilang Mark Jayven Tallo sa SWU, Ralph Dinolan sa USJ-R, Leonard Santillan sa UV ug Charles Pepito sa USC.
Didto magsugod og sipyat sa ilang tirada ang Lancers nga daw naluya dihang kanunay na maglabaw ang Warriors.
Ang Lancers gipangulohan ni Santillan, kinsa miposa’g 16 puntos
Ang champion coach sa Warriors nga si Britt Reroma kinsa mihatag sa USC sa una nilang korona sa CESAFI, nagpasalamat sa suporta sa administrasyon ilabi na sa ilang team manager nga si Bogo City Mayor Celestino E. Martinez, Jr., patron nga silang Perry Lim ug Joe Soberano, team consultant Julian Macoy ug athetic director nga si Fr. Adriano Ocariza, SVD.
Puntos matag usa
USC (64) – Olago 26, Peprio 8, Rabat 6, Ortega 6, Tapagan 6, McAloney 4, Magat 3, Laguyo 3, Lim 2.
UV (53) – Santillan 16, Arong 7, Akomo 7, Cabanero 6, Manzo 4, Suerte 4, Aguirre 4, Codilla 4, Segumpan 1. (BANAT NEWS)