CARSON CITY, California – Sa ikatulong higayon, nabuligan ta sa maayong palad nga makataak sa gibansagan nga Golden State. Apan gikan sa siyudad sa mga anghel kon Los Angeles, mibiyahe pa kita og mga 15 minutos alang sa final nakong destinasyon nga mao ang Carson City aron mokober sa labing unang Pinoy Pride sa Amerika niadtong Sabado sa gabii (Domingo oras sa Pilipinas) dinhi sa StubHub Center.
Sa presscon pa lang daan, ako nang naaninaw nga namungingi og Fil-Am nga sakop sa media ang mitambong sa maong okasyon. Gani ang ilang Mayor Pro-Tempore, nga Vice Mayor sa atong nasud, usa sab ka Pinoy nga usahay mag-Tinagalog pa sa dihang mipadangat sa iyang mensahe sa pagtimbaya.
Paggawas nako sa Carson Civic Center, ako gilayon nasigpatan ang monumento sa tinamod natong nasudnong bayani nga si Dr. Jose P. Rizal nga mapasigarbuhong nagbarog sa usa ka halapad nga hawanan.
Dinhi wa’y dudang misantop sa akong huna-huna nga ang Carson dunay lig-ong koneksiyon sa mga Pinoy.
Mao nang wala nako matingala pa sa dihang akong nasayran nga lunlon Pinoy ang drayber sa among media van. Dakung Pilipino sab ang kanunay moabi-abi kanako sa front desk labi na atol sa tingpamahaw dinhi sa Travelodge Hotel nga akong giestaran.
Mas misamot pa ang akong tingsi sa dihang akong giilaila, ang maanyag nga cashier sa Subway fastfood nga maoy akong dangpanan sa dihang bation og kagutom taga dakbayan sa Danao ug bansay pa gani kaayo siyang mosulti sa pinulongang Binisaya.
Mao nang makaingon ko nga maora’g Pilipinas ra ang Carson sa kadaghan sa mga Pinoy nga nagtikaw-tikaw dinhi, timaan nga dili gyud mabitin ang talento ug kakugi sa mga Pinoy sa bisan asang suok sa kalibotan.
* * *
Ang akong gikoberan dihhi nga "Pinoy Pride 33: Philippines vs. the World" makasaysayanon gyud dili lamang sa kalibotan sa paugnat sa kusog sa nasud, apan hasta usab namong mga Sugbuanon nga tigsulat og isports.
Kini gumikan kay mao kini ang labing unang boxing event sa Amerika diin dunay saktong representasyon ang sakop sa Cebu media. Samtang gidala ang pangan sa Banat News ug sa igsuon niining mantalaan nga The Freeman, akong gikauban dinhi sa teritoryo ni Uncle Sam mao ang tinamod nakong higala si Salven Lagumbay.
Ang banggiitang international judge gikan sa Sugbo maoy nagrepresentar sa Cebu Daily News, Inquirer ug Philboxing.com. Dia sab ang suod nakong mga amigo nga sila si Jun Migallen, ang sports editor sa Superbalita ug Edri Aznar sa Sunstar. Siyempre dili sab mawala si Dong Secuya, ang tinahod nakong higala nga maoy utok luyo sa philboxing.com, ang nag-unang sports website sa kalibotan.
Sa dihang akong gipasalamatan sa oportunidad, si ALA Promotions CEO ug President Michael Aldeguer mitubag nga angayan lamang nga kabahin kami sa makasaysayanon nilang kalihukan kay saksi man kami ug gani miapil pa og bisbis aron motubo ug mamunga sa hingpit ang gipugas nilang binhi sa Pinoy Pride lima ka tuig ang milabay.