LOS ANGELES – Bisan og duna na’y nahitabong panagsabot-sabot alang sa posibleng engkuwentro tali sa wala pa’y pildeng ‘pound-for-pound’ king nga si Roman ‘Chocolatito’ Gonzalez sa Nicaragua ug ni two-division world champion Donnie ‘Ahas’ Nietes sa ALA Boxing Gym, dili pa kini mahitabo sa labing dali nga panahon.
Nahayagan ang posibilidad sa maong sangka tali sa labing tadhan nga mga boksidor sa lower weight division karon human sila mikulit og impresibong kadaugan batok sa tagsa-tagsa nila ka mga kontra sa susamang adlaw.
Dinhi sa West Coast, si Nietes nakadepensa sa iyang WBO ug The Ring light flyweight titles human kulataha ang Mehikanong si Juan ‘Pinky’ Alejo sa main event sa makasaysayanong “Pinoy Pride 33: Philippines vs. the World” dinhi sa StubHub Center.
Samtang didto sa East, si Gonzalez nagpabiling WBC flyweight champion human gi-TKO sa ikasiyam nga hugna si Fil-Am Brian Viloria didto sa Madison Square Garden sa New York.
Si ALA Promotions President ug CEO Michael Aldeguer mikompirma nga duna na’y negosasyon nga mitumaw alang sa posibleng ‘superbout’ tali nilang Nietes ug Gonzalez.
“Yes, I’ve already had talks with K2 Promotions, the promoter of Gonzalez, and they are interested in a fight with Nietes. Nietes also wants the fight, and we want the fight,” matud pa ni Aldeguer.
Apan malangay pa ang maong sangka kay si Aldeguer mibutyag nga sunod rota ni Nietes mao ang ‘hometown fight’ didto sa dakbayan sa Bacolod karong Marso nga lagmit mao sa’y una niyang pag-arangkada sa iyang boksingero ubos sa flyweight division.
“Nietes has a fight in March next year in Bacolod. He hasn’t fought there since 2011. It’s gonna be a hometown fight for him. Most likely he’s gonna go up in flyweight and we’ll see if he’s comfortable in that weight class,” dason pa ni Aldeguer.
Katapusan miaway si Nietes atubangan sa iyang mga hometown fans niadto pang Oktubre 8, 2011 didto sa University of St. La Salle Coliseum sa Bacolod diin siya misakmit og 12-round ‘unanimous decision’ nga kadaugan batok sa Mehikanong si Ramon Garcia Hirales aron pagbira sa WBO light flyweight title.
Kabahin sa away batok ni Gonzalez, si Aldeguer mipasalig nga mohimo sila og seryosong negosasyon uban sa kampo ni Gonzalez uban ang panghinaut nga mahatagan nila og katumanan ang maong away sa dili pa matapos ang tuig 2016. (BANAT NEWS)