CEBU, Philippines - Buot sa University of San Carlos Warriors nga tapuson na nila ang ilang karibal sa korona nga University of the Visayas Green Lancers sa dihang mag-abot sila sa Game-4 sa ‘best-of-five” finals series sa Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.
Ang duwa gitakda sa alas-4 sa hapon.
Oras na lang ang paabuton, hisayran na kun masakmit ba sa Warriors ang labing una nilang titulo nga wala pa nila mahimo sukad niadtong 1958.
Ang Warriors nag-una karon sa series, 2-1 ug kun ilang mausban ang Lancers matapos na ang ilang panagribal karong gabii.
Midaog ang Warriors sa Game-3, 87-76 niadtong Martes nga nagbutang kanila sa mas maayong posisyon nga mahimong kampiyon. Ang Warriors maoy midaog sa series opener, 76-70 niadtong Domingo, apan ang Lancers mibawos sa Game-2, 70-63 aron matabla ang series, 1-1.
Masaligon si USC coach Britt Reroma nga iyang mahatagan ang Warriors sa labing una niining titulo human sa lima ka dekada nga pagpaabot. Kun molampos siya, siya unya ang ikaduhang coach sa USC nga midaog og titulo sunod ni anhing Juan ‘Dodong’ Aquino Sr.
Sa laing bahin, si UV coach Gary Cortes kompiyansa nga makabawi sila karon ug mabuhi ang ilang paglaum alang sa ilang ika-11 nga CESAFI title sud sa 15 ka tuig.
Aron matuman, ang Lancers mopahimulos sa dakung bentaha sa ilang championship experience
Ang mas labing gikahinaman sa duwa karon mao ang match-up tali sa duha ka imports nga sila si Shooster Olago sa Warriors ug Steve Cedrick Akomo sa Lancers. Mas dominante si Olago ilabi na sa Game-3 diin miiskor siya og 32 puntos itandi ni Akomo nga aduna la’y nuybe puntos.
Ang Lancers magsalig sa tandem nilang June Kent Manzo ug veteran Alfred Codilla, apan angay nilang bantayan ang mga snipers sa Warriors nga naglakip nilang Ian Jefferson Tagapan, Victor Rabat, Nico Magat ug Ian Ortega. Anaa sab sa Warriors si Charles Pepito, kinsa usa ka rebounding demon.
Sa bench players, maoy nakabentaha ang Lancers, apan sa ilang kahimtang karon, daw gimingaw sila sa serbisyo nilang Rhaffy Octobre ug Monic Soliva kinsa daku kaayong tabang sa opensa.